Пасол Украіны пра справу Шаройкі: Чаму не пададзеныя якія-небудзь довады?

Ігар Кізім мяркуе, што Шаройка зрабіў сваё «прызнанне» пад ціскам беларускіх спецслужбаў.

Пасол Украіны Ігар Кізім не ўпэўнены ў тым, што Павел Шаройка зрабіў сваё прызнанне не пад ціскам. Пра гэта дыпламат паведаміў tut.by, каментуючы «справу ўкраінскіх шпіёнаў».

«Я ўважліва азнаёміўся з матэрыяламі брыфінгу, праведзенага КДБ. У мяне ўзнікае некалькі пытанняў. Што за агентурная сетка? Чаму паведамляецца толькі пра затрыманне Паўла і неназванага беларуса? Калі гэта сетка, то там павінна быць шмат удзельнікаў. Другое - чаму не пададзеныя якія-небудзь довады - напрыклад, фота- або відэаматэрыялы?» - пацікавіўся Ігар Кізім.

Ён распавёў, што раніцай 25 кастрычніка Павел Шаройка заходзіў у амбасаду Украіны - ягоная жонка працуе ў дыпмісіі вольнанаёмнай супрацоўніцай. Потым журналіста затрымалі.

«Кажуць, узялі з довадамі злачынства - дзе кадры аператыўнай здымкі? Момант затрымання?» - прадоўжыў задаваць пытанні ўкраінскі дыпламат.

Ён таксама скептычна паставіўся да інфармацыі КДБ пра тое, што Шаройка прызнаўся ў злачынстве.

«Прабачце, я не хачу каментаваць працу спецслужбаў. Я не ведаю, як працуюць спецслужбы Беларусі, але я ведаю, як яны працавалі ў савецкія часы... На наступнай сустрэчы консул удакладніць у Паўла ўсе дэталі, і тады можна будзе казаць пра тое, як гэта прызнанне было зроблена», - адзначыў Кізім.

Пасол Украіны таксама пракаментаваў заўвагу афіцыйнага прадстаўніка КДБ аб дамоўленасці не даводзіць да агульнага ведама факт затрымання Шаройкі.

«Гэта не працуе ў выпадку з журналістам. Бо карэспандэнт не можа проста знікнуць - ягоныя калегі, кіраўніцтва пачнуць шукаць чалавека. Што ж тычыцца майго маўчання, то я шчыра спадзяваўся на тое, што гэтая сітуацыя, гэта непаразуменне развяжацца», - растлумачыў дыпламат.

Ён таксама распавёў, што ўкраінская старана на просьбу беларускай адклікала з Менска першага сакратара пасольства Украіны Ігара Скварцова. Паводле слоў пасла, Скварцоў пакінуў Беларусь пасля 25 кастрычніка, але канкрэтную дату не ўдакладніў.

Найбліжэйшым часам амбасада мае намер працаваць над тым, каб да Паўла Шаройкі зноў дапусцілі консула і жонку журналіста.

«Мы ўжо звярталіся з просьбай пусціць да яго жонку. Але нам сказалі, што «ў гэтым няма патрэбы», - дапоўніў пасол.

Адказваючы на пытанне, ці магло затрыманне Шаройкі стаць адной з тэм гутаркі Лукашэнкі і прэзідэнта Украіны Пятра Парашэнкі 2 лістапада, Ігар Кізім прызнаўся, што не можа гэтага выключаць.

«Інфармацыю пра Паўла Шаройку я перадаў у МЗС Украіны. Ці быў праінфармаваны кіраўнік дзяржавы - не магу сцвярджаць або выключаць», - сказаў пасол.

Нагадаем, пра затрыманне ўкраінскага журналіста ў Менску стала вядома 17 лістапада. 20 лістапада ў КДБ пракаментавалі затрыманне Паўла Шаройкі. Як паведаміў афіцыйны прадстаўнік установы Дзмітрый Пабяржын, Павел Шаройка стварыў агентурную сетку з ліку грамадзян Беларусі, «якія за грашовае ўзнагароджанне выконвалі ягоныя заданні збору звестак выведвальнага характару ў вайскова-палітычнай сферы». Яго вінавацяць у шпіянажы.

Са слоў Пабяржын, Шаройка «прызнаўся, што з'яўляецца супрацоўнікам кадравага апарату вайсковай выведкі Украіны» і працаваў у Беларусі пад прыкрыццём.

Дзейнасць Шаройкі ў Беларусі, са слоў прадстаўніка КДБ, каардынаваў

супрацоўнік Галоўнай управы выведкі Мінабароны Украіны Ігар Скварцоў, які дзейнічаў пад прыкрыццём пасады дарадцы пасольства Украіны. Яго абвясцілі персонай нон грата.

На брыфінгу таксама паведамілі, што пры зборы сакрэтных матэрыялаў затрыманы грамадзянін Беларусі, якi вёў шпіёнскую дзейнасць у інтарэсах Украіны. Беларус сваю віну прызнаў і паведаміў, што на заданне ўкраінскай выведкі за грашовае ўзнагароджанне займаўся зборам і перадачай інфармацыі аб абараназдольнасці Беларусі. Яго абвінавачваюць у здрадзе дзяржаве.