Крамлю рыхтуюць двайны ўдар

Прыватная выведка ЗША назвала галоўную пагрозу для Крамля.

Пакуль расейская эканоміка працягвае знаходзіцца ў застоі, Злучаныя Штаты ацэньваюць варыянты ўзмацнення ціску на Крэмль у рамках двухбаковага падыходу, які забароніць грамадзянам ЗША выкупляць расейскія запазычанні, а таксама возьме на прыцэл расейскіх алігархаў. Міністэрства фінансаў ЗША сфармулюе прапановы паводле санкцый і, як чакаецца, апублікуе іх у пачатку наступнага года. Хоць няма гарантый, што дзве гэтыя ініцыятывы будуць прынятыя, бо абедзве яны, магчыма, выклічуць палітычную барацьбу паміж адміністрацыяй прэзідэнта ЗША Дональда Трампа і Кангрэсам, гэтыя прапановы дадуць Злучаным Штатам два важкія варыянты для далейшага нанясення шкоды ўжо і так моцна саслабленай расейскай эканоміцы.

Пра гэта гаворыцца ў справаздачы прыватнай амерыканскай разведвальна-аналітычнай кампаніі Stratfor, якая ёсць у распараджэнні «Апострофа».

У лютым 2018 года Міністэрства фінансаў ЗША апублікуе справаздачу з падрабязным апісаннем наступстваў прапанаваных санкцый для Расеі і сусветнага рынку. Дзейсныя санкцыі не даюць некаторым расейскім кампаніям, такім як «Ашчадбанк» і «Раснафта», выпускаць аблігацыі для заходніх інвестараў, але не перашкаджаюць выпускаць еўрабонды расейскаму ўраду. Каб абысці абмежавальныя меры супраць расейскіх кампаній, Крэмль, як паведамляецца, узяў на сябе суверэнную запазычанасць і перадаў яе кампаніям, якія знаходзяцца пад санкцыямі. У выніку ў гэтым годзе замежнікі купілі 30% агульнага аб'ёму аблігацый, выпушчаных урадам Расеі (на суму 25 млрд дал.), у параўнанні з 5% у папярэднім годзе.

Расейскі ўрад плануе ўзяць у пазыку яшчэ 18 млрд дал., каб падлатаць дзіркі ў сваім федэральным бюджэце на 2018 год. Расейская эканоміка пераходзіць з рэцэсіі ў стагнацыю, фінансавыя рэсурсы Масквы высільваюцца, і гэта на фоне таго, як яна рыхтуецца да непрыемных фінансавых цяжкасцяў у 2018 годзе. Абмежаванні ЗША на запазычанні яшчэ больш ускладняць Крамлю захаванне стабільнага федэральнага бюджэту і падтрымку дзяржаўных прадпрыемстваў. І ўсё ж яны не змогуць цалкам разбурыць далікатную расейскую эканоміку.

Другая справаздача Міністэрства фінансаў ЗША, якая будзе апублікаваная ў лютым, будзе прысвечаная самым прыкметным расейскім алігархам і будзе ўключаць інфармацыю аб іх сем'ях, стане, доказам карупцыі, знешніх дзелавых сувязяў і крыніцы прыбытку. Тыя, чые імёны будуць у спісе, будуць лічыцца кандыдатамі на ўвядзенне абмежавальных мер у дачыненні да іх, але не апынуцца пад санкцыямі аўтаматычна.

Тактыка своеасаблівая: у мінулым персанальныя санкцыі ЗША ўжываліся толькі супраць некалькіх крамлёўскіх алігархаў, большасць з якіх мелі мала актываў за мяжой і жылі ў РФ. Цяпер гэты спіс папоўніцца людзьмі, якія не выключна лаяльныя да Крамля і якія маюць мала дачынення або зусім не ўплываюць на замежную палітыку Расеі. Паводле пагалоскаў, у спіс уключаць тых, хто мае буйныя актывы на Захадзе і жыве за мяжой. Сувязі такіх алігархаў з Крамлём больш абумоўленыя неабходнасцю, а не лаяльнасцю. Крэмль спадзяецца на бізнэсоўцаў для падтрымкі недзяржаўных структур, фінансавага сектара і ўзроўню занятасці насельніцтва.

Жорсткія меры ЗША супраць такой групы асоб акажуць моцны ўплыў на расейскую эканоміку і палітыку і, магчыма, настрояць многіх прадстаўнікоў расейскіх элітаў супраць Крамля, робяць выснову ў прыватнай выведцы ЗША.