У беларусаў няма грошай: Thirty Seconds to Mars не прыедуць у Менск
3- 9.11.2017, 14:48
- 16,884
Вядомы гурт апублікаваў графік гастрольнага тура ў падтрымку новага альбома.
Thirty Seconds to Mars апублікавалі графік гастрольнага тура ў падтрымку новага альбома Walk On Water - канцэрт у Менску ў яго не ўвайшоў. Інфармацыя размешчаная на афіцыйным сайце музыкаў. Як паведамілі tut.by арганізатары канцэртаў амерыканскага рок-гурта ў Менску, прычына ў эканамічнай сітуацыі ў Беларусі.
Турнэ Thirty Seconds to Mars у Еўропе стартуе 11 сакавіка ў нямецкім Кёльне. Найбліжэйшыя для жыхароў Беларусі канцэрты гурта пройдуць у Санкт-Пецярбургу, Маскве і Кіеве ў канцы красавіка.
- Усё ўпіраецца ў эканамічную сітуацыю, - тлумачаць у «Канцэртхолгруп». - У людзей няма грошай. Мы не зможам сабраць «Чыжоўка-Арэну», нягледзячы на аншлаг у 2015 годзе.
На этапе ўзгаднення арганізатары ацэньвалі суму, якую агучваў бок гурта яшчэ ў 2015 годзе для Беларусі.
- Даведаліся, што ўмовы засталіся такімі ж, - кажа адзін з арганізатараў Павел. - Пакуль што гэта нерацыянальна і эканамічна не выгадна для нас.
Як паведамілі ў «Канцэртхолгруп», цяпер у прыярытэце расейскія музыкі, поп-сцэна.
Нагадаем, Thirty Seconds to Mars тройчы выступалі ў Менску: у 2011 годзе ў Палацы спорту, у 2014 - на «Мінск-Арэне» і ў 2015 - на «Чыжоўка-Арэне». Джарэду Лета і ягонай камандзе так спадабалася наша краіна, што да свайго апошняга візіту ў Менск амерыканскія альтэрнатыўныя рокеры падрыхтавалі абноўленую праграму і спецыяльнае шоў. Тады лідар Thirty Seconds to Mars Джарэд Лета шпацыраваў з менчукамі вуліцамі сталіцы.
Беларуская публіка заўсёды захоплена сустракала гурт з Лос-Анджэлеса, а канцэрты Thirty Seconds to Mars праходзілі з аншлагам.