Пасля візіту «шунявак» у Дашкевічаў прапалі грошы і кот
81- 23.03.2017, 10:45
- 21,974
Няпрошаныя госці прыходзілі, калі гаспадароў не было дома.
Лідар «Маладога фронту» Зміцер Дашкевіч, магчыма, знаходзіцца ў СІЗА КДБ, паведамляе nn.by.
Пакуль ягоная жонка Анастасія Дашкевіч высвятляла месцазнаходжанне мужа, у іх дома прайшоў ператрус.
«Адзінае, чаго я баялася, гэта начнога ператрусу з маленькімі дзеткамі на руках. Як яны будуць рэагаваць, як іх супакойваць і г. д. Але супрацоўнікі карных органаў паклапаціліся пра гэта: ператрус прайшоў без маёй прысутнасці. Што тут шукалі і што знайшлі застанецца загадкай», — напісала Наста Дашкевіч у «Фэйсбуку».
«Я прыйшла дадому, адкрыла дзверы сваім ключом, зайшла ў кватэру, мяне здзівіла, што дзверы адчыненыя, стаяць крэслы ў пакоі (відаць, панятыя сядзелі). Рэчы дасталі, адзенне Дзмітрыя — камуфляж, дакументы наверсе. Татальнага бязладдзя няма, але відаць, штосьці шукалі», — патлумачыла яна ў каментары для «Радыё Свабода».
Як высветлілася, з кватэры прапалі грошы — блізу 300-400 даляраў у двух канвертах.
Акрамя таго, прапаў кот Леапольд.