Дырэктарка ДК у Сеніцы: У нас не толькі сцяг «ДНР», у нас і партрэт Пуціна вісіць
37- 22.04.2017, 18:18
- 24,881
Расцяжка непрызнанага ўтварэння вісіць у сеніцкім доме культуры.
Спявачка Жанэт, якая выпадкова сфатаграфавалася з сімволікай «Данецкай народнай рэспублікі», наракае на сеніцкі дом культуры. Гэта там яна ўбачыла расцяжку непрызнанага ўтварэння, піша nn.by.
Дырэктарка Сеніцкага дома культуры Наталля Цярэнцьева не бачыць праблемы ў сітуацыі.
«Які гэта можа выклікаць скандал? Там яно вісіць і вісіць. Гэта расцяжка гурта «СССР», яны выступалі ў «Данецкай рэспубліцы» з канцэртамі і прывезлі сабе як сувенір. Нічога жудаснага не здарылася. Яны проста павесілі гэтую сімволіку».
Аматарскі гурт «СССР» — два мужчыны ў камуфляжы, якія працуюць на базе Сеніцкага дома культуры. Яны блізкія да расейскага Саюза ветэранаў Афганістана.
«На Данбасе мы пабывалі ўжо сем разоў, з самых першых абстрэлаў», — казалі яны ў нядаўнім інтэрв'ю. Лёталі і ў Сірыю, павіншаваць расейскіх вайскоўцаў.
Калі б нейкі гурт прывёз з сабой сімволіку «Правага сэктара», ці дазволіла б яе павесіць дырэктарка? «Вы мне такія пытанні не задавайце, — адказвае яна. — Ці мала хто дзе штосьці паклаў? Гэта ж іхнія асабістыя рэчы». Але запэўнівае, што хаця б сцяг нацысцкай Нямеччыны ў Доме культуры не вісіць.
«А што вас бянтэжыць? — перапытвае Наталля Цярэнцьева. — Мы нідзе нічога не прапагандуем. У нас вісіць і партрэт прэзідэнта, і партрэт прэзідэнта Расеі, нічога дрэннага ў гэтым няма».
У канцы гутаркі Наталля Цярэнцьева параіла звяртацца з пытаннямі да свайго наймальніка — у Менскі райвыканкам.