Маёмасць двух баранавіцкіх прадпрыемстваў сыдзе з малатка

Прадпрыемствы, якія апынуліся на мялі, дарэмна спрабуюць пазбавіцца ад «баласту».

Стратныя Баранавіцкі завод санэлектразагатовак і УНР-83 спрабуюць выратаваць сваё становішча і выстаўляюць на продаж нерухомую маёмасць.

Чатырохпавярховы цэх ААТ «Баранавіцкі завод санэлектразагатовак» плошчай больш за трох тысяч квадратных метраў на вуліцы Пралетарская, 46 выстаўленая на продаж за 79,5 тысячы рублёў, паведамляе сайт ІМПЗ Берасцейскай вобласці, піша intex-press.by.

Будынак ААТ «83 Кіраванне начальніка работ» плошчай 620 квадратных метраў на вуліцы Чурыліна, 17 паспрабуюць прадаць за 91,4 тысячы рублёў.

Аўкцыёны продажу нерухомай маёмасці гэтых прадпрыемстваў адбудуцца 28 красавіка, а 12 гадзіне, у вялікай зале Дома Саветаў па адрасе: г. Баранавічы вул. Савецкая, 79. Заявы на ўдзел у аўкцыёне будуць прымаць да гэтага дня ўключна.

Няпростая сітуацыя на заводзе санэлектразагатовак неаднаразова разглядалася на пасяджэннях Баранавіцкага гарвыканкама. 2016 год прадпрыемства завяршыла са стратамі і заняло апошняе месца ў рэйтынгу прадпрыемстваў горада паводле вынікаў працы за мінулы год.

— Для стабілізацыі абстаноўкі на гэтым прадпрыемстве неабходныя кардынальныя меры – аптымізацыя колькасці работнікаў, зямельных участкаў, вытворчых плошчаў, – заявіла на пасяджэнні гарвыканкама 10 лютага першая намесніца старшыні Баранавіцкага гарвыканкама Наталля Фёдарава, распавядаючы пра сацыяльна-эканамічныя вынікі мінулага года.

Не лепш ідуць справы і ў УНР-83. Праз адсутнасць на гэтым прадпрыемстве перспектыў эканамічнага росту гарадскімі ўладамі прынятая пастанова аб яе ліквідацыі.