Як Пуцін Піцеру надакучыў

У Санкт-Пецярбургу затрыманыя дзясяткі ўдзельнікаў акцыі «Надакучыў».

Пра гэта паведамляе «Адкрытая Расея». Паводле паведамленняў карыстальнікаў сацыяльных сетак, паліцыянты ўжывалі да актывістаў сілу.

Акцыі «Надакучыў» руху «Адкрытая Расея» праходзяць сёння ў многіх гарадах краіны. Мэта акцыі – запатрабаваць ад Уладзіміра Пуціна адмовіцца ад удзелу ў выбарах кіраўніка дзяржавы ў 2018 годзе. У Маскве некалькі дзясяткаў актывістаў накіроўваюцца да будынка адміністрацыі прэзідэнта, ля якога вартуюць сотні паліцыянтаў.

Раней у Кемераве на акцыі «Надакучыў» былі затрыманыя блізу 20 актывістаў. У Іжэўску, Горна-Алтайску, Новакузнецку і Цюмені ў паліцыю патрапілі арганізатары пратэстаў. У некалькіх гарадах, у тым ліку ў Новасібірску і Томску, акцыі ўжо прайшлі, яшчэ ў некалькіх – Уфе, Пермі, Чэлябінску, Саратаве, Кургане, Ульянаўску, Казані, Кіраве, Туле, Ніжнім Ноўгарадзе і Растове-на-Доне – праходзяць цяпер.