У Кіеве актывісты заблакавалі будынак «Рассупрацоўніцтва»
7- 8.04.2017, 12:42
- 18,851
Актывісты «Нацыянальнага корпуса» сарвалі правядзенне дыктоўкі расейскай мовы ў Кіеве.
8 красавіка актывісты партыі «Нацыянальны корпус» заблакавалі ўваход у Расейскі цэнтр навукі і культуры ў Кіеве, дзе павінна была прайсці акцыя «Татальная дыктоўка» расейскай мовы, сказала прэс-сакратар прадстаўніцтва Рассупрацоўніцтва ва Украіне Святлана Валыненка агенцтву "Интерфакс-Украина".
Са слоў Валыненкі, каля будынка размясцілася 40-50 чалавек, на тэрыторыю цэнтра іх не пусціла ахова. Яна дадала, што актывісты накінулі ланцуг на браму і заблакавалі праход смеццевымі бакамі.
Прэс-сакратарка распавяла, што ў будынку павінна была адбыцца міжнародная акцыя «Татальная дыктоўка» – традыцыйная штогадовая дыктоўка расейскай мовы, што ў 2017 годзе праходзіць у 72 краінах свету.
На сайце цэнтра сёння з'явілася паведамленне, што "Татальнага дыктоўка" у Кіеве не адбудзецца. Падрабязнасці не паведамляюцца.
У прэс-службе «Нацыянальнага корпуса» пацвердзілі ў Facebook, што чальцы партыі заблакавалі ўваход у будынак і сарвалі акцыю.
«Цэнтр варожай культуры ва Украіне, нейкае «прадстаўніцтва Рассупрацоўніцтва» ініцыявала з'езд, на якім раніцай 8 красавіка расейскія супольнасці павінны былі пісаць «татальную дыктоўку». А вось да самога напісання былі прыцягнутыя прадстаўнікі «бананавых рэспублік Л/ДНР», пасля чаго іх павінны былі таксама прызнаць «культурнымі». Актывісты «Нацыянальнага корпуса» (Кіеў) прыйшлі пад будынак на вуліцы Барысаглебскай, дзе іх ужо чакалі праваахоўнікі, каб сарваць гэтае мерапрыемства, што і атрымалася паспяхова!» – гаворыцца ў паведамленні.