Справа Цыгана

Ураджэнцу Беларусі ва Украіне пагражае пажыццёвае зняволенне.

Ва Украіне працягваецца следства ў крымінальнай справе, распачатай у дачыненні да ўраджэнца Беларусі, грамадзяніна Латвіі Васіля Крупеніча. Латвійскія СМІ называюць Крупеніча «каралём прыбалтыйскай кантрабанды» па мянушцы Цыган, піша belaruspartisan.org.

Падчас перасячэння мяжы Цыган ледзь не адправіў на той свет пецярых украінскіх вайскоўцаў.

Некалькі дзён таму Ровенскі гарадскі суд задаволіў хадайніцтва следчага Службы бяспекі Украіны і падоўжыў арыштаванаму тэрмін утрымання пад вартай да 17 ліпеня.

З тэксту судовай пастановы вынікае, што Васіля Крупеніча затрымалі ўвечары 19 сакавіка, калі ён на Mercedes-Benz спрабаваў уехаць у Польшчу праз міжнародны аўтамабільны пункт пропуску «Ягодзін». Падчас паглыбленага агляду аўтамабіля ў тэхнічнай адтуліне паліўнага бака мытнікі знайшлі нешта відавочна лішняе. Была прынятая пастанова адкрыць бак з салона «мерса».

Падчас гэтай працэдуры Крупеніч знаходзіўся на пасажырскім сядзенні. Калі бак адкрылі, ён, як адзначаецца ў пастанове, «усведамляючы грамадска-небяспечны характар свайго дзеяння, жадаючы прычыніць смерць супрацоўнікам праваахоўных органаў у сувязі з выкананнем імі службовых абавязкаў, чыркнуў запалкай і кінуў яе ў адкрытую тэхнічную адтуліну паліўнага бака аўтамабіля з мэтай ажыццявіць яго выбух».

Крупеніч паспеў запаліць і кінуць некалькі запалак, пакуль яго не скруцілі. На шчасце, ніводная ў мэту не трапіла. У машыне і побач з ёй у гэты момант знаходзіліся пяцёра вайскоўцаў. А бак быў запраўлены не толькі бензінам. З ёмістасці праваахоўнікі дасталі некалькі загорнутых у цэлафан пірапатронаў ПК-16М, якія выкарыстоўваюцца ў вайсковай авіяцыі для аварыйнага катапультавання крэсла пілота.

Дзе затрыманы іх набыў і з якой мэтай, цяпер высвятляе следства. Крупеніч падазраецца ва ўчыненні трох злачынстваў: кантрабанды, незаконны вываз за межы Украіны вайсковай і спецыяльнай тэхнікі і замах на жыццё супрацоўніка праваахоўнага органа.

Прычым яго жарцікі з запалкамі на мяжы кваліфікуюцца як наўмыснае асабліва цяжкае злачынства, за ўчыненне якога прадугледжана пакаранне ў выглядзе пазбаўлення волі на тэрмін ад 9 да 15 гадоў або пажыццёвае зняволенне.

Магчыма, украінскаму правасуддзю атрымаецца зрабіць тое, што латвійскаму не ўдалося.

Васіль Крупеніч (Vasilijs Krupeņičs) - асоба ў Латвіі вядомая, можна сказаць, медыйная.

Пра сябе ён журналістам паведамляў, што нарадзіўся ў БССР у 1960 годзе ў вёсцы Церабень Пінскага раёна. З 1975 года жыве ў Даўгаўпілсе. Ваяваў у Афганістане, быў паранены і ўзнагароджаны медалямі СССР, Афганістана, Латвіі і Расеі.

З'яўляецца сябрам праўлення «Даўгаўпілскага цэнтра садружнасці ветэранаў Афганістана «Перавал». Актыўна займаецца палітыкай - кіруе Латгальскім аддзяленнем партыі «Народны кантроль», і бізнэсам - валодае транспартнай кампаніяй.

У той жа час ён не раз быў героем крымінальных гісторый. Латвійскія СМІ паведамлялі, што на Крупеніча неаднаразова заводзіліся крымінальныя справы, называлі яго «лідарам крымінальнай групоўкі» і «каралём прыбалтыйскай кантрабанды».

У лістападзе 2011 года суд Латгальскага прадмесця Рыгі ўзяў яго пад варту як арганізатара захоўвання кантрабандных тавараў. Паведамлялася, што на заканспіраваным складзе канфіскавалі больш за 15 тысяч пачак кантрабандных цыгарэт Winston, Kiss, Prima, Fest, NZ з акцызнымі маркамі Расеі і Беларусі і 10 тон вадкасці з характэрным пахам спірту, 20 літраў алкагольных напояў з акцызнымі маркамі трэціх краін, дзве стрэльбы, патроны і арбалет.

Разам з Крупенічам затрымалі і начальніка першага аддзела Бюро эканамічнай паліцыі Рыжскага рэгіёну. Аднак афіцэр ціха сышоў на пенсію, а чым скончылася справа Крупеніча, мясцовыя СМІ, акрамя паведамленняў, што яго адправілі ў суд, больш не пісалі. Хутчэй за ўсё, нічым, раз Цыган без абмежаванняў перасякаў межы, пакуль не трапіўся ва Украіне.