На хімзаводзе ў Берасці адбыўся выкід шкодных рэчываў

46 чалавек былі эвакуяваныя ратавальнікамі з тэрыторыі прадпрыемства, адзін рабочы заводу шпіталізаваны.

Раніцай 6 траўня на Берасцейскім заводзе бытавой хіміі адбыўся выцек пароў азотнай і артафосфарнай кіслот. На месцы здарэння працавалі супрацоўнікі МНС, медыкі, следчыя і экспэрты.

46 чалавек былі эвакуяваныя ратавальнікамі з тэрыторыі прадпрыемства. 1 рабочы заводу шпіталізаваны.

«Паводле папярэдніх звестак, пары азотнай і артафосфарнай кіслот патрапілі ў памяшканне 30×50 метраў у адным з вытворчых цэхаў. У выніку з падазрэннем на атручванне хімічным рэчывам для агляду ў лякарню шпіталізаваны 53-гадовы слесар прадпрыемства. Праводзяцца работы для асаджэння пароў рэчыва», - распавялі tut.by ў МНС.

Ва ўстанове таксама дадалі, што пагроза распаўсюду за межы будынка адсутнічае.

«Паводле папярэдніх звестак, 6 чэрвеня 2017 гады блізу 9 гадзін у цэху ААТ «Брэстбытхім» у выніку разгерметызацыі ёмістасці з азотнай кіслатой адбыўся выцек пароў хімічнага рэчыва», - распавяла афіцыйная прадстаўніца Следчага камітэта Юлія Ганчарова.

Яна таксама паведаміла, што 63-гадовы слесар прадпрыемства, жыхар абласнога цэнтра, шпіталізаваны ў рэанімацыйнае аддзяленне цэнтральнай гарадской лякарні. Мужчына знаходзіцца ў свядомасці.

Аўтаматычная метэаралагічная станцыя на вуліцы Паўночнай, якая знаходзіцца ў паўтары кіламетрах ад месца здарэння, перавышэнняў забруджвальных рэчываў у паветры не зафіксавала.

«Станцыя працуе ў рэжыме рэальнага часу. Паказанні здымаюцца кожныя 20 хвілін. Паводле звестак на 11.00, перавышэнняў гранічна дапушчальных канцэнтрацый забруджвальных рэчываў - дыяксіду азоту, дыяксіду серы, аксіду вугляроду, азону, серы, вугляроду, цвёрдых часцінак фракцый ПМ-10 - у атмасферным паветры няма», - адзначылі ў лабараторыі.

Некаторыя памяшканні завода здаюць у арэнду іншым фірмам. Са слоў відавочцаў, падобны на хлор пах адчулі нават у суседніх будынках - яго прынесла праз адчыненыя вокны.

- Падышлі да суседняга цэху, а там немагчыма было дыхаць зусім. Убачылі мужчыну ва ўзросце прыкладна 60 гадоў. Твар быў шэры, яму дапамаглі выйсці далей на свежае паветра. Потым мужчыну забрала хуткая дапамога ў рэанімацыю, - распавядае відавочца Ірына.

Паводле яе слоў, спачатку працоўныя завода бегалі і крычалі, што канцэнтрацыя рэчыва перавышаная ўдвая. Пазней - нібыта забруджванне распаўсюдзілася на радыус 50 метраў.

- Людзей папрасілі адысці далей, але дадому пакуль пайшлі не ўсё. Мы пыталіся ў лекараў, што адбылося - але тыя адказалі, што ім самім толкам нічога не гавораць.

Далей тэрыторыі завода людзей не эвакуявалі. Кажуць, не было чуваць і сігналізацыі пасля ПП.

- На хімзаводзе яна дакладна ёсць, раней яе часам уключалі - напэўна, на вучэннях. Яе было добра чуваць вакол.

Падчас працы ратавальнікаў тэрыторыя завода была ачэпленая, рух па прылеглых вуліцах абцяжараны. А 12 гадзіне супрацоўнікі МНС пакінулі тэрыторыю завода.

Берасцейскі завод бытавой хіміі - прадпрыемства з даўнімі праблемамі, цяпер знаходзіцца ў працэдуры санацыі. Тут працуюць блізу 100 чалавек, хоць раней колькасць супрацоўнікаў дасягала 900. Завод выпускае бытавую хімію і мыйныя сродкі, у тым ліку - у аэразолі. У канцы 90-х на стратнаедаўгах прадпрыемства прыйшлі расейскія акцыянеры, да 2005 года асноўным уладальнікам берасцейскага завода была расейская кампанія АПК. Потым «Бытхім» дастаўся берасцейскаму бізнэсоўцу Алегу Ранчынскаму. У 2016 годзе ў дачыненні да Ранчынскага распачалі крымінальныя справы ў ч.3 арт.424 КК - «Злоўжыванне ўладай ці службовымі паўнамоцтвамі» і ў ч.2 арт.243 КК - «Ухіленне ад выплаты падаткаў, што пацягнула прычыненне шкоды ў асабліва значнай суме». Другая крымінальная справа дайшла да суда. Прысуд абвясціць не паспелі - абвінавачваны з'ехаў у ЗША.

30 лістапада 2016 года Эканамічны суд Берасцейскай вобласці абвясціў пастанову аб санацыi прадпрыемства. Пазыкі завода складаюць блізу 3 млн даляраў.

Артафосфарная кіслата - сярэдняй сілы, у звычайным стане ўяўляе з сябе крышталі, добра растваральныя ў вадзе. Ужываецца ў прамысловасці і сельскай гаспадарцы. А таксама, напрыклад, у стаматалогіі для пратручвання або ачышчэння металічных паверхняў ад іржы. Яна таксама ўваходзіць у склад некаторых харчовых дабавак (для надання кіслага смаку).

Азотная кіслата належыць да рэчываў 3-га класа небяспекі. Яе пары вельмі шкодныя для чалавека: раздражняюць дыхальныя шляхі, а на скуры сама кіслата пакідае язвы. У вялікіх аб'ёмах выкарыстоўваецца ў хімічнай прамысловасці. Ужываецца ў вытворчасці мінеральных угнаенняў, ювелірнай справе і графіцы, у вытворчасці выбуховых рэчываў і сінтэзе атрутных, у вытворчасці фарбаў і лекаў.