Пасол Беларусі ў РФ заявіў аб жаданні купіць комплексы «Іскандэр»

Комплексы здольныя паражаць цэлі на адлегласці да 500 км.

Беларусь у будучыні можа разгледзець пытанне аб закупцы ў Расеі ракетных комплексаў «Іскандэр». Пра гэта заявіў пасол Беларусі ў Расеі Ігар Петрышэнка, паведамляе РБК.

Петрышэнка нагадаў, што цяпер у Беларусі асноўным зенітна-ракетным комплексам застаецца сістэма С-300. У будучыні Беларусь можа набыць як зенітныя комплексы С-400 для абароны паветранай прасторы, так і ракетныя комплексы «Іскандэр».

«Пастаўкі комплексаў С-400 і аператыўна-тактычных ракетных комплексаў «Іскандэр» могуць быць разгледжаныя з улікам з'яўлення новага ўзбраення з палепшанымі характарыстыкамі. Чакаем, што ў перспектыве на ахову паветраных межаў «саюзнай дзяржавы» заступяць Су-30см войскаў ВПС і СПА Беларусі», - распавёў Петрышэнка.

У траўні камандуючы Вайскова-паветранымі сіламі і Войскамі супрацьпаветранай абароны Узброеных сіл Беларусі генерал-маёр Алег Двігалеў заявіў, што Беларусь мае намер закупіць у Расеі партыю знішчальнікаў Су-30СМ. Таксама ён распавёў пра планы набыцця Менскам вучэбна-трэніровачных самалётаў Як-130.

Аператыўна-тактычны ракетны комплекс «Іскандэр» паступілі на ўзбраенне расейскага войска ў 2006 годзе. Ён здольны паражаць цэлі на адлегласці да 500 км, абыходзячы пры гэтым сістэмы супрацьпаветранай і супрацьракетнай абароны. Пры гэтым ракеты комплексу можна абсталяваць як неядзернымі, так і ядзернымі ўдарнымі часткай. Раней, у чэрвені 2016 года гендырэктар дзяржкарпарацыі «Растэх» Сяргей Чэмезаў заявіў, што «Іскандэр» «знаходзіцца ў спісе прадукцыі, забароненай да экспарту», і Расея не мае намеру перадаваць комплекс іншым краінам.