Малады дызайнер з Беларусі скарыў Парыж дзёрзкай правакацыяй
6- 26.06.2017, 12:52
- 11,713
Беларускі студэнт прэзентаваў у сталіцы моды сваю калекцыю «Provokator. Без твару».
Крэатыўны дызайнер з Магілёва скарыў сусветную сталіцу моды, паведамляе СТВ.
Навучэнец эканамічнага прафесійна-тэхнічнага каледжа прэзентаваў у Парыжы сваю калекцыю «Provokator. Без твару».
Асаблівасці гэтай калекцыі - апушчаныя каўняры і дадатковыя рукавы. Прыхільнікам класікі зразумець цяжка.
Пакуль мадэлі зашпільваюць апошнія гузікі і робяць сэлфі ў незвычайных строях, малады куцюр'е заляпляе iм твары скотчам. У свеце моды запамінаецца эмоцыя вобразу. Чым ярчэй, тым лепш.
«Каб мадэлі не адцягвалі, я вырашыў заляпіць вочы, рот. Публіка гэта ўспрымае з цікавасцю - незвычайна, па-новаму», - распавёў мадэльер-канструктар, навучэнец Магілёўскага эканамічнага прафесійна-тэхнічнага каледжа Ігар Плятнёў.
У Парыжы Ігар апынуўся пасля поспеху на нацыянальным фестывалі «Млын моды». Задача гэтай калекцыі - здзіўляць, шакаваць. Касцюмы выкананы з бавоўны і плашчоўкі. А ідэя для стварэння такой калекцыі ў аўтара нарадзілася, калі ён выпадкова звярнуў увагу на складзеныя адзін у адзін тры шклянкі.
«Мне крыніцай натхнення здаліся гэтыя шклянкі. Дзесьці два вокі, дзесьці рот, незвычайныя формы ў цікавых інтэрпрэтацыях», - кажа Ігар Плятнёў.
Замежныя калегі з свету моды ацанілі працу беларускага дызайнера.
Праз месяц Ігар атрымае ў сваім каледжы прафесію «мадэльер-канструктар». Свой дыплом ён прысвяціў пінжакам.