Пяць найлепшых прадуктаў для дзейнасці мозгу

Гэтыя прадукты дапамогуць палепшыць памяць і ўвагу.

Каб палепшыць памяць і працу мозгу, захаваць працаздольнасць і ясную галаву, med2.ru прапануе зарадзіцца карыснымі элементамі.

Карысныя ўласцівасці брокалі

Хочаш, каб з гадамі здольнасць мозгу апрацоўваць інфармацыю не зніжалася, розум заставаўся ясным, а памяць цвёрдай? Часцей еж гародніну і садавіну! Асабліва карысная для мозгу брокалі. У ёй шмат вітаміну К і бору, нястача якіх прычыняецца да зніжэння мазгавой чыннасці. Вельмі карысныя яблыкі. Рэчывы, якія змяшчаюцца ў іх, абараняюць каморкі мозгу ад аксідантнага стрэсу - ён вядзе да страты памяці і зніжэння інтэлекту.

Какава-бабы

У іх змяшчаюцца поліфенолы (магутныя раслінныя антыаксіданты) і мінералы, якія паляпшаюць кровазварот абсягаў мозгу, якія адказваюць за хуткасць рэакцыі і памяць. Акрамя таго, какава-бабы абараняюць мозг ад акісляльных працэсаў, якія прычыняюцца да хваробы Альцгаймэра. Каб папярэдзіць гэтае захворванне, лекары раяць выпіваць па кубку штодзень.

Карысныя ўласцівасці рыбы

Калі ў арганізм паступае мала поліненасычаных тлустых квасаў амега-3, то каморкі мозгу дрэнна дзеюць. Дзякуючы гэтым квасам лепш цыркулюе кроў, а значыць, у каморкі трапляе больш пажыўных рэчываў. Найлепшай крыніцай амега-3 з'яўляюцца тлустыя сарты рыбы - напрыклад, ласось, сардзіны, тунец, стронга. А яшчэ ў рыбе шмат вітамінаў A, D, E, а таксама жалеза, фосфару, кальцыю, магнію, цынку і селену, патрэбных для падтрымання чыннасці мозгу.

Карысць арэхаў

Для энэргазабеспячэння каморак мозгу патрэбны вітамін Е, на які багатыя арэхі. Вітамін Е таксама абараняе каморкавыя мембраны ад пашкоджанняў і актывізуе разумовыя працэсы. А яшчэ ў арэхах шмат вітаміну С - магутнага антыаксіданту, які выкарыстоўваецца для вытворчасці нэрвовых каморак і нэйрамэдыятараў, а таксама вітаміну РР, каратыну, дубільных рэчываў, жалеза, кобальту і цынку. Але памятай, што арэхі вельмі каларыйныя, таму захапляцца імі не варта.

Малочныя прадукты

Яны змяшчаюць вялікую колькасць вітамінаў групы В, якія адказваюць за захаванне памяці, уплываюць на стан цэнтральнай нэрвовай сістэмы, абараняюць мозг ад стрэсаў, а таксама прадухіляюць заўчаснае старэнне каморак галаўнога мозгу.