The Washington Post: Умяшанне Крамля ў амерыканскія выбары прывяло да адваротнага эфекту

Атака Пуціна на амерыканскі палітычны працэс аб'яднала звычайна расколатых на два лагеры заканадаўцаў.

«Супрацоўнікі выведкі часам кажуць аб «непажаданым выніку», калі таемныя аперацыі правальваюцца і ў выніку прычыняюць шкоду краіне-ініцыятарцы. Праз год менавіта гэта адбылося з расейскай спробай таемна ўмяшацца ў прэзідэнцкія выбары ў ЗША, што прывяло да шэрагу процілеглых ненаўмысных наступстваў для Масквы», - мяркуе аглядальнік The Washington Post (пераклад - inopressa.ru) Дэвід Ігнаціус.

Журналіст прапануе ўвазе чытачоў прыклады «сусветнага супраціву» расейскім кампаніям уплыву.

Расейскае ўмяшанне прывяло да моцнай дзвюхпартыйнай рэакцыі ў адказ з боку Кангрэсу ЗША. Прыняцце ў мінулым месяцы абсалютнай колькасцю галасоў новых санкцый супраць Расеі паказала, што напад Пуціна на амерыканскі палітычны працэс аб'яднаў звычайна расколатых на два лагеры заканадаўцаў, разважае Ігнаціус.

«Еўрапейская палітыка таксама ажывілася ў выніку расейскай спробы маніпуляваць дыскусіяй. Агонь папулісцкага абурэння, які расейцы ўпотай раздзімалі, - які ахапіў Брытанію падчас рэферэндуму аб выхадзе з ЕЗ, - быў патушаны. Памяркоўныя цэнтрысты ўтрымаліся ў Нідэрландах, Францыі і Нямеччыне», - гаворыцца ў артыкуле.

Расейскія маніпуляцыі ў інтэрнэце прывялі да новых намаганняў з боку кампаній і арганізацый грамадзянскай супольнасці ў барацьбе з такімі «фальшывымі навінамі», піша журналіст, адзначаючы адпаведныя захады, якія прымаюцца ў Facebook і Google.

«Расследаванні прывялі да выкрыцця арганізацый і кампаній, як мяркуецца звязаных з расейскай хакерскай кампаніяй, такіх як WikiLeaks. Сувязь Расеі і WikiLeaks даследуецца ў новым выданні «Чырвонага павуціння» (The Red Web), якое выйдзе ў гэтым месяцы, - выдатнай кнігі расейскіх аўтараў журналісцкіх расследаванняў Андрэя Салдатава і Ірыны Бараган. Яны, сярод іншага, сцвярджаюць, што WikiLeaks перавёў, прынамсі, частку свайго вэб-хостынгу ў Расею ў жніўні 2016 года», - піша Ігнаціус.

«Праблема Пуціна ў тым, што ён перагнуў палку. Ягоная непрыязнасць да Клінтан і падтрымка Трампа прывялі да парушэння ключавога правілы таямнічай аперацыі - а менавіта, забеспячэння таго, што яна застанецца таямніцай. Як Пуцін зноў і зноў даведваецца кожны дзень, таемныя аперацыі ў наданні ўплыву даюць зваротны вынік, калі выкрываюцца», - рэзюмуе журналіст.