Фотафакт: Як выглядала беларуская моладзь у 1930-м годзе
9- 22.08.2017, 16:38
- 33,382
Фотаздымак распавёў, як апраналіся беларусы ў пачатку 20-га стагоддзя.
Вёска Мыслабаж у Ляхавіцкім раёне. У жніўні тут працавала экспедыцыя Студэнцкага этнаграфічнага таварыства, паведамляе «Радыё Свабода».
«Гэты фотаздымак зроблены ў 1934 годзе. На ім моладзь вёскі Мыслабаж (Ляхавіцкі раён), - кажа ўдзельнік экспедыцыі, аспірант кафедры гісторыка-культурнай спадчыны РІВШ Павел Булаты. - У міжваенны перыяд у гэтай вёсцы быў калектыў мастацкай самадзейнасці, які выконваў менавіта фальклорныя рэчы - песні, танцы, ладзіў вечарыны, тэатральныя пастаноўкі. Створаны ён быў прыкладна ў 1920-я актывістамі Таварыства беларускай школы. Пазней, ужо ў 1930-я, магчыма, знаходзіўся пад апекай Беларускага інстытута гаспадаркі і культуры».
Павел кажа, што, калі меркаваць па фота, гурт быў «нацыянальна свядомы». Пра яго дзейнасць вядома мала. Мясцовыя памятаюць толькі, што такі гурток быў. Цікава, што ён дзейнічаў і пасля далучэння гэтай тэрыторыі да БССР. Фальклорны калектыў ёсць у Мыслабажы і цяпер.
Сам здымак знойдзены ў этна-куце Ляхавіцкай гімназіі. На адваротным баку ёсць надпіс: «Мыслабаж, 1934».
«На жаль, ідэнтыфікаваць кагосьці не атрымалася», - кажа Павел Булаты.