Комлік-малодшы праходзіў паводле «справы патрыётаў», а старэйшы - цяпер на Акрэсціна

Затрыманы за «нявыплату падаткаў» галоўны бухгалтар прафзвязу РЭП Ігар Комлік знаходзіцца на Акрэсціна.

Хто такі галоўны бухгалтар незалежнага прафзвязу РЭП Ігар Комлік, фігура якога не была публічнай? Некалькі фактаў пра яго апублікавала «Радыё Свабода»:

Ігар Комлік - старшыня Менскай гарадской арганізацыі РЭП, галоўны бухгалтар РЭП. Карэнны мянчук, нарадзіўся 12 ліпеня 1959 года.

У 1976 годзе скончыў сярэднюю школу №57, паступіў у Беларускі політэхнічны інстытут.

Паводле першай вышэйшай адукацыі - інжынер-механік.

З 1994 да 2004 года працаваў у канструктарскім бюро дакладнага электроннага машынабудавання. Быў старшынём прафсаюзнай арганізацыі.

У 1997-2001 гадах вывучаў правазнаўства ў Міжнародным інстытуце прававых і сацыяльных стасункаў.

З 2010-га - старшыня Менскай гарадской першаснай арганізацыі РЭП, галоўны бухгалтар РЭП.

Сын Ігара Комліка - Андрэй Комлік-Ямацін - быў затрыманы паводле так званай «справы патрыётаў». Андрэй разам з жонкай Настай ствараў вопратку ў нацыянальным беларускім стылі.

У Ігара Комліка двое ўнукаў.

Як раней паведамляў сайт Charter97.org, 2 жніўня адбыліся ператрусы ў офісе незалежнага прафзвязу РЭП, а таксама дома ў яго лідара Генадзя Фядыніча, Ігара Комліка і Наталлі Пічужкінай. Канфіскаваныя электронныя носьбіты, вінчэстэры кампутараў і дакументацыя.

Акрамя таго, ператрус прайшоў у офісе Беларускага незалежнага прафзвязу ў Салігорску. Супрацоўнікі Дэпартамента фінансавых расследаванняў Камітэта дзяржаўнага кантролю (ДФР КДК) канфіскавалі ноўтбукі і вінчэстэры кампутараў.

Старшыня прафзвязу РЭП Генадзь Фядыніч і былая рэдактарка прафсаюзнага сайта praca-by.info Наталля Пічужкіна пасля допыту адпушчаныя. А вось галоўны бухгалтар прафзвязуа РЭП Ігар Комлік накіраваны ў менскі Цэнтр ізаляцыі правапарушальнікаў.

У КДК паведамілі, што крымінальная справа распачатая «паводле фактаў нявыплаты падаткаў».