Відэафакт: Актывістка Femen напала на прэзідэнта Чэхіі на выбарчым пункце
13- 12.01.2018, 20:16
- 18,346
Праз інцыдэнт служба бяспекі прэзідэнта Чэхіі вывела Зэмана з памяшкання для галасавання.
У Празе ў дзень прэзідэнцкіх выбараў на выбарчым пункце, дзе галасаваў дзейны кіраўнік дзяржавы Мілаш Зэман, адбыўся інцыдэнт. Украінская актывістка руху Femen раптам выскачыла з натоўпу журналістаў і агаліла грудзі, на якіх быў надпіс «Зэман - курва Пуціна». Гэтую ж фразу яна пракрычала некалькі разоў.
Паводле інфармацыі «Чэшскай тэлевізіі», гаворка ідзе пра актывістку Ангеліну Дыяш. Да з'яўлення Зэмана на выбарчым пункце ў сталіцы Чэхіі яна хавалася ў натоўпе прадстаўнікоў СМІ. Калі кіраўнік дзяржавы падышоў да стала выбарчай камісіі і рыхтаваўся паказаць свае дакументы, Дыяш падбегла да яго.
Czech President Milos Zeman was rushed by a bare-chested protester from the activist group Femen as he cast his vote in the first round of the country's presidential election in Prague. pic.twitter.com/9lyyevGj77
— RFE/RL (@RFERL) 12 января 2018 г.
Мяркуючы з відэа з выбарчага пункта, ужо апублікаванага ў інтэрнэце, актывістка Femen падчас руху зняла з сябе кашулю, агаліўшы грудзі з правакацыйным надпісам. За мэтар ад Зэмана дзяўчыну спыніў адзін з ахоўнікаў прэзідэнта, збіўшы яе з ног і паваліўшы на падлогу. Адразу пасля гэтага актывістцы заламалі рукі за спіну і надзелі на іх кайданкі. Неўзабаве яе вывелі з памяшкання.
Праз інцыдэнт служба бяспекі прэзідэнта Чэхіі вывела Зэмана з памяшкання для галасавання. Аднак праз некалькі хвілін кіраўнік дзяржавы вярнуўся і апусціў бюлетэнь у скрыню. «Як вы бачыце, мая ахова працуе дастаткова добра, бо яна (актывістка Femen - заўвага) так і не дапяла да мяне», - пракаментаваў інцыдэнт Зэман.
Прэзідэнцкія выбары ў Чэхіі праходзяць на працягу двух дзён - 12 і 13 студзеня. На галоўную пасаду ў краіне прэтэндуюць дзевяць чалавек, у тым ліку і сам Зэман, якога сацыёлагі і экспэрты называюць галоўным фаварытам прэзідэнцкай гонкі.