Нікі Хэйлі: Перамовамі пра ўдзел у Алімпіядзе КНДР спрабуе адцягнуць увагу

Ад рэжыму Кім Чэн Ына трэба патрабаваць поўнага спынення ядзерных выпрабаванняў.

Сталая прадстаўніца ЗША ў ААН Нікі Хэйлі мяркуе, што з дапамогай перамоў аб удзеле ў зімовай Алімпіядзе 2018. Паўночная Карэя спрабуе адцягнуць увагу ад сваіх дзеянняў.

У інтэрв'ю "Голасу Амерыкі" Хэйлі адзначыла, што "гэта добра, што Паўночная Карэя і Паўднёвая Карэя размаўляюць адна з адной".

"Думаю, што гэта імкненне адцягнуць увагу (ад дзеянняў Пхеньяна - рэд.). Я мяркую, што гэта менавіта тое, што заўсёды робіць Паўночная Карэя: калі абстаноўка напальваецца, пачынае размову", - сказала яна.

Са слоў амерыканскай дыпламаткі, памылкова меркаваць, што факт перамоў значна змяншае небяспеку, якая сыходзіць ад Паўночнай Карэі.

"Да таго часу, пакуль яны сапраўды не спыняць выпрабаванні балістычных ракет, да таго часу, пакуль яны не прадэманструюць гатоўнасць да дэнуклеарызацыі, мы павінны быць надзвычай асцярожныя. Яны і раней вялі гэтыя перамовы... Мы павінны пераканацца ў тым, што яны гатовыя дзейнічаць, і што гэтыя дзеянні маюць на мэце поўнае спыненне дзейнасці ў ядзернай сферы, якую яны вядуць", - падкрэсліла Хэйлі.

Нагадаем, 17 студзеня стала вядома, што КНДР і Паўднёвая Карэя дамовіліся выйсці на цырымонію адкрыцця зімовых Алімпійскіх гульняў 2018 года пад адзіным сцягам, а таксама дамовіліся стварыць супольную жаночую каманду ў хакеі з шайбай для ўдзелу ў Алімпіядзе.