Геолагі: Аўстралія і Канада былі адным цэлым

1,7 мільярда гадоў таму частка аўстралійскага кантынента была адным цэлым з сучаснай Паўночнай Амерыкай.

Мінерал цыркону, выяўлены каля горада Джорджтаўн на паўночным усходзе Аўстраліі, быў больш за ўсё падобны на цыркон з Лаўрэнтыйскага плато (Канадскага шчыта) - геалагічнай фармацыі, што цяпер складае паўночны ўсход Канады з Вялікімі азёрамі, піша «Популярная механика».

Узрост адкладаў, у якіх выявілі мінерал, складае 1,7 мільярда гадоў; у гэты час тэрыторыя сучаснай Канады і частка Аўстраліі складалі адзіны масіў сушы, пішуць навукоўцы ў артыкуле, апублікаваным у часопісе Geology.

Пра тое, што частка Аўстраліі раней была адзіным цэлым з паўночнай часткай Паўночнай Амерыкі, падазравалі яшчэ ў 70-я гады: тады было даказана, што 1,13 млрд гадоў назад яны складалі частку суперкантынента Радзінія. Аднак дакладнае ўзаемнае размяшчэнне мацерыкоў у гэты перыяд заставалася невядомым.

Аўстралійскія цырконы кажуць пра яшчэ больш старажытнае суседства сучасных Канады і паўночнай Аўстраліі: відавочна, яны былі часткай суперкантынента Калумбія, які, як мяркуецца, існаваў у перыяд ад 1,8 да 1,5 млрд гадоў таму. Цырконы, знойдзеныя каля Джорджтаўна, сфармаваліся на дне неглыбокага мора, якое перастала існаваць, калі кантыненты падзяліліся, і частка Паўночнай Амерыкі сутыкнулася з аўстралійскім рэгіёнам Маўнт-Айза, утварыўшы сучасную Аўстралію.

З тых часоў кантыненты яшчэ шмат разоў сыходзіліся ў адзін суперкантынент і разыходзіліся; апошні суперкантынент, Пангея, перастаў існаваць блізу 175 мільёнаў гадоў таму.