Відэафакт: У Берасці бяспраўнік на хуткасці 115 км/г спрабаваў адысці ад ДАІ

Пагоня адбылася ў ноч з 7 на 8 студзеня.

У Берасці падчас нагляду за бяспекай дарожнага руху экіпаж ДАІ ехаў па вуліцы 28 ліпеня ў бок Піянерскай. Насустрач ім даслоўна ляцеў BMW. Прыбор фіксацыі хуткасці, які быў усталяваны ў службовай машыне, зафіксаваў у гоншчыка хуткасць у 115 км/г пры дазволеных 60 км/г, паведамляе ДАІ Берасцейскай вобласці.

Уключыўшы пробліскавыя маячкі супрацоўнікі ДПС сталі пераследаваць парушальніка, неаднаразова патрабуючы яго спыніцца, аднак той рабіць гэтага не збіраўся і на высокай хуткасці працягнуў ехаць па горадзе.

Спрабуючы ўцячы ад інспектараў, кіроўца «БМВ» некалькі разоў праехаў на чырвоны сігнал святлафора, парушаў патрабаванні дарожных знакаў. Пагоня скончылася на скрыжаванні з кругавым рухам на Бульвары Шаўчэнка.

Як высветлілася, за стырном аўтамабіля знаходзіўся 20-гадовы жыхар вёскі Страдзеч, у якога ніколі не было пасведчання кіроўцы. У дачыненні да зуха было складзена сем адміністрацыйных пратаколаў.