Скрынка на мосце спыніла рух у Гомелі

Скрынка была пустой і не ўяўляла ніякай небяспекі.

На Палескім мосце ў Гомелі кіроўцы і мінакі заўважылі падазроны прадмет - скрыня, якая ляжала паміж палосамі на дарозе. На месца выклікалі міліцыю. Рух па мосце быў заблакаваны, што выклікала з'яўленне затораў.

На месца здарэння прыбылі некалькі экіпажаў міліцыі. Супрацоўнікі міліцыі ачапілі месца. У сацыяльных сетках у гэты час выказваліся версіі, што папяровая скрыня выпадкова звалілася з грузавіка. Іншыя выказалі здагадку, што адбываюцца вучэнні спецслужбаў. Але на самой справе аказалася так, што скрыню згубіў на ўздыме на мост няўважлівы кіроўца, паведамляе сайт Prо Гомель.

«Скрынку праверылі, яна была пустой, і ніякай небяспекі не ўяўляе. Рух па мосце аднаўляецца», - паведаміў афіцыйны прадстаўнік УУС Гомельскага аблвыканкама Віталь Прыстромаў.

Рух праз мост быў затрыманы на паўгадзіны. Цяпер затораў няма, аўтамабілі могуць праязджаць праз мост.