«Барысаўводаканал» паставіў на вушы ўвесь горад

А цяпер ціха папрасіў прабачэння за нязручнасці.

У пачатку верасня «Барысаўводаканал» паведаміў на сваім сайце і прадубляваў інфармацыю на дзвярах пад'ездаў пра тое, што з кастрычніка 2018 года налічэнне за паслугі водазабеспячэння і водаадвядзення будзе праводзіць не «Барысаўводаканал», а разлікова-даведачная ўправа Барысаўскага гарадскога УП «Жыллё», піша ex-press.by.

Тлумачылася гэта пераходам на новую сістэму разлікаў з дапамогай адзінай сістэмы разлікаў за жыллёва-камунальныя паслугі - АІС «Разлік-ЖКП».

Жыхарам горада адводзілася пяць дзён, з 24 да 28 верасня, каб перадаць сведчанні лічыльнікаў вады апошнім разам у «Барысаўводаканал». Перадаваць можна было праз інтэрнэт і праз тэлефон.

Большасць законапаслухмяных барысаўцаў сталага веку, як правіла, не ведаюць, якой кнопкай уключаецца кампутар і тым больш, як карыстацца электроннай поштай. Яны пачалі тэлефанаваць на пазначаныя нумары, якіх было шмат.

Бяда была ў тым, што датэлефанавацца з першага разу атрымалася лічаным шчасліўчыкам, астатнія чулі ў слухаўцы кароткія гудкі. Нерваў паджылымі людзьмі было выдаткавана нямерана. Але цалкам марна.

Бо аб'ява пра тое, што плату за ваду будзе прымаць цяпер УП «Жыллё», цудоўным чынам знікла з сайта «Барысаўводаканал». Затое 12 кастрычніка незаўважна для пераважнай большасці жыхароў горада ў раздзеле «Навіны» гэтага сайта з'явілася іншая інфармацыя.

Навіна ў тым, што аплата за паслугі водазабеспячэнне і водаадвядзенне за верасень месяц 2018 будзе праводзіцца без змен, на асабовыя рахункі «Барысаўводаканал». А пераход на новую сістэму разлікаў пры дапамозе АІС «Разлік-ЖКП» перанесены на лістапад-снежань 2018 года з тэхнічных прычын.

«Дзяржаўнае прадпрыемства «Барысаўводаканал» выбачаецца за часовыя нязручнасці», - так заканчваецца новая аб'ява.

Цікава, якія словы ненарматыўнай лексікі прыйдуць на розум паджылым барысаўцам у адказ на прынесеныя прабачэнні? І што чакае ў лістападзе? Зноў пяць дзён на тэлефоне?

Пытанні, на жаль, рытарычныя.