Беларускі фатограф атрымаў прыз на прэстыжным еўрапейскім конкурсе

Беларус стаў найлепшым на думку гледачоў.

Беларускі фотамастак Аляксей Шлык стаў уладальнікам прыза глядацкіх сімпатый у еўрапейскім конкурсе ING Unseen Talent Award 2018, які адбываецца ў Амстэрдаме, паведамляе belmir.by.

У якасці прыза ён атрымае замову на стварэнне новага праекту для калекцыі ING Group - транснацыянальнай карпарацыі, якая спецыялізуецца на фінансах і банкаўскай справе.

Галоўная ж узнагарода конкурсу - прыз журы на10 тысяч еўраў на стварэнне свайго ўласнага праекта - апынулася ў Яака Кахіланіемі з Фінляндыі.

Пераможцы былі вызначаныя сярод пяці фіналістаў. А тых, у сваю чаргу, раней адабралі скаўты арганізатараў конкурсу, тыя, што шукалі таленавітых маладых фатографаў ва ўсёй Еўропе.

Фіналісты прайшлі курс навучання ад брытанскага фотамастака і рэжысёра Айзека Джуліена, а затым стварылі серыю работ на тэму «Новыя гарызонты: што абяцае і чым пагражае нам будучыня».

Па выніках гэтай творчасці да 20 верасня і былі названыя пераможцы: беларус - гледачамі ў выніку інтэрнэт-галасавання, фін - чальцамі журы конкурсу.

Як тлумачыцца, у сваёй серыі, створанай для ING Unseen Talent Award, Аляксей Шлык даследуе чалавечую творчасць у сферы вынаходак, накіраваных на ўстойлівае развіццё.

Гэта альтэрнатыўныя развязанні для атрымання «зялёнай» энэргіі, развязанні ў стылі «зрабі сам», якія могуць (ці не) дапамагчы людзям выжыць у экалагічна забруджанай будучыні.