У Палескім радыяцыйным запаведніку дазволілі турызм з паляваннем

Межы і плошча Палескага дзяржаўнага радыяцыйна-экалагічнага запаведніка змяніліся.

Адпаведны ўказ Лукашэнкі сёння афіцыйна апублікаваны на Нацыянальным прававым інтэрнэт-партале.

Дакумент зацвердзіў новую рэдакцыю раздзелу аб запаведніку, а таксама яго мяжы і плошчу. Як і раней, у Палескім дзяржаўным радыяцыйна-экалагічным запаведніку вызначаныя запаветная і эксперыментальна-гаспадарчая зоны.

На тэрыторыі эксперыментальна-гаспадарчай зоны дазволілі пчалярства, конегадоўлю, пладаводства, а таксама турызм і арганізацыю і правядзенне палявання, піша tut.by.

Акрамя таго, раку Прыпяць, якая знаходзіцца ў межах запаведніка, аднеслі да рыбалоўных угоддзяў і перадалі іх запаведніку - для вядзення прамысловага рыбалоўства.

А вось збор пладоў дзікарослых раслін - ад грыбоў да ягад і арэхаў, на тэрыторыі запаведніка па-ранейшаму забаронены - «за выключэннем збору ў навукова-даследчых і эксперыментальна-гаспадарчых мэтах».

Указ уваходзіць у дзеянне праз 10 дзён пасля яго афіцыйнага апублікавання.

Палескі дзяржаўны радыяцыйна-экалагічны запаведнік стварылі ў 1988 годзе, праз два гады пасля аварыі на Чарнобыльскай атамнай станцыі. Ён размешчаны ў Хойніцкім, Нараўлянскім і Брагінскім раёнах Беларусі. Тут захоўваецца трэць усёй «чарнобыльскай спадчыны», якая дасталася Беларусі пасля аварыі на атамнай станцыі: 30% цэзію, 70% стронцыю і 97% плутонію.