Праз санкцыі могуць заблакаваць карткі расейцаў для атрымання заробкаў

Цэнтрабанк РФ заявіў пра пагрозу санкцый супраць картак «Мір».

Банк Расеі рыхтуецца да магчымага ўвядзення санкцый супраць нацыянальнай аплатнай сістэмы «Мір», да якой у прымусовым парадку падключылі ўсіх бюджэтнікаў краіны. Падрыхтоўка ідзе са жніўня, калі з'явіліся паведамленні аб магчымым узмацненні жорсткасці санкцый ЗША, заявіла ў чацвер на сустрэчы з банкірамі намесніца начальніка ўправы дэпартамента нацыянальнай аплатнай сістэмы ЦБ Святлана Рамашкіна, піша finanz.ru.

З яе слоў, праца пачалася пасля таго, як пра санкцыі паведамілі «па тэлевізары».

«З таго дня, як было абвешчана па тэлевізары аб тым, што недзе нехта зноў плануе новыя санкцыі ўвесці, мы бегаем і шукаем шляхі для таго, каб засцерагчыся, прадугледзець магчымыя спосабы абароны», - цытуе Рамашкіну ТАСС.

«Мы бегаем без стомы два месяцы. Шчыра скажу, часам начамі», - заявіла прадстаўніца ЦБ.

Пры гэтым Рамашкіна прызналася, што дакладна не ведае, ці будзе гатовая нацыянальная аплатная сістэма да новых санкцый. Яна выказала надзею, што магчымыя санкцыі не паўплываюць на яе.

Нацыянальная аплатная сістэма «Мір» была створаная летам 2014 гады пасля таго, як у расейскіх банкаў праз санкцыі ўзніклі праблемы з міжнароднымі аплатнымі сістэмамі Visa і MasterCard.

З пачатку года ў кангрэс ЗША было ўнесена 6 законапраектаў аб узмацненні жорсткасці санкцый супраць Расеі. Два з іх уключаюць узмацненне жорсткасці санкцый у дачыненні да энэргетычнага і фінансавага сектараў, алігархаў і дзяржаўных прадпрыемстваў, забарону на інвестыцыі ў расейскую дзяржзапазычанасць і аперацыі з расейскімі дзяржбанкамі.

Таксама прадугледжаная забарона на «выдачу ліцэнзій амерыканскім грамадзянам на ўдзел у дзейнасці, звязанай з пэўнымі праектамі ў здабычы нафты ў Расейскай Федэрацыі».