На вуліцы ў Менску зімуе бусел

Мясцовыя не ведаюць, што з ім рабіць.

Менчукі распавялі tut.by, што ў двары ў Сухарава пасяліўся бусел і не можа паляцець на зімоўку. Мы паглядзелі, як жыве птушка, і даведаліся ў спецыялістаў, што рабіць мясцовым жыхарам у такой сітуацыі.

27 лістапада мянчанка Надзея заўважыла бусла на полі за домам на Школьнай, 16. Дзяўчына патэлефанавала ў МНС, міліцыю, а таксама паведаміла ў арганізацыю «Ахова птушак Бацькаўшчыны». Мянчанка перажывае, што птушка замерзне.

- Ён лётаць не можа. Толькі ходзіць. У яго штосьці з крылом - яно трохі за высока, - кажа яна.

Мы знайшлі птушку не адразу. Яна ходзіць каля будаўнічай пляцоўкі непадалёк ад царквы. Лётаць бусел усё ж можа, але не на далёкія адлегласці.

Надзеі сказалі, што бусла чапаць не трэба - паляціць сам. На параду спецыялістаў, мясцовыя падкормліваюць яго курынымі шыйкамі. Праўда, кідаць ежу даводзіцца здалёк - птушка баіцца людзей. Як толькі ўбачыць кагосьці надыходзячага - ляціць.

Мясцовыя перажываюць, што нягледзячы на звароты, птушку ніхто не забраў. А што з ёй рабіць далей, жыхары не ведаюць.

Заўважым, што МНС займаецца выратаваннем, у першую чаргу, людзей. На выклікі пра птушак і жывёл ратавальнікі выязджаюць у складаных сітуацыях, калі іх жыццю пагражаюць знешнія фактары і ў гэты момант не паступаюць выклікі пра выратаванне людзей.

«Не рэкамендуем лавіць, каб не нашкодзілі птушцы»

Спецыяліст прыродаахоўных пытанняў грамадскай арганізацыі «Ахова птушак Бацькаўшчыны» Сямён Левы распавядае, што звычайна буслы пакідаюць Беларусь у 20-х чыслах жніўня, але ў апошнія гады яны сталі рэгулярна зімаваць у сталіцы. Прычыны зімоўкі розныя: пацяпленне, наяўнасць вакол Менска незамярзальных крыніц, сметнікі, дзе можна раздабыць ежу.

- Такіх выпадкаў - дзясяткі. Застаюцца не толькі тыя птушкі, якія параненыя, але і тыя, якія лётаюць. Калі яны пералятаюць на кароткі адлегласць, як, напрыклад, бусел у Шабанах, які абраў мэтанакіравана месца для зімоўкі. Гэта можа сведчыць пра тое, што яны захоўваюць энэргію, якую ў зімовы перыяд складана здабыць, таму што корму не так шмат. Я не ўпэўнены, што бусел на Школьнай паранены і не здольны да палёту. Калі б ён не мог лётаць, ён бы не змог зрабіць нават кароткія пералёты.

Сямён Левы кажа, што лавіць птушку не трэба - гэта стрэс для яе і траўманебяспечная сiтуацыя. Усё, што можна зрабіць для камфортнай зімоўкі бусла ў Сухарава, - падкормліваць яго.

- Мы ведаем, што яны паспяхова пераносяць зіму, галоўнае - наяўнасць корму. Гэта могуць быць набытыя мясныя паўфабрыкаты, якія трэба размарозіць і парэзаць, гэта можа быць дробная марская рыба - мойва. Холад для іх не так страшны, як голад - у буслоў тэмпература цела блізу 40 градусаў, таксама іх абараняе апярэнне. Пагроза для птушкі - нізкая тэмпература прыкладна мінус 15 градусаў і ніжэй. Тады іх трэба лавіць і шукаць цёплае памяшканне. Але, ведаючы ўсе гэтыя выпадкі зімоўкі буслоў, можам выказаць здагадку, што птушка зможа перазімаваць тут, а вясной паляцець.

Заапарк бусла таксама не ўратуе. Паводле слоў спецыяліста, каб дарослая птушка з дзікай прыроды трапіла туды, ёй трэба прайсці каранцін. Але прайсці яго няма дзе.

Акрамя гэтага, спецыяліст падсумаваў, што канфіскацыя птушак з прыроды - працаёмкі працэс. Згодна з парадкам аб канфіскацыі, збіраецца камісія з ветэрынарам, якую павінен склікаць камітэт прыродных рэсурсаў. На месцы камісія назірае за буслам, а ветэрынар дае заключэнне па знешніх прыкметах птушкі пра тое, ці патрабуе яна дапамогі. Калі так - тады робіцца спроба адлову і ідзе пошук месца для зімоўкі бусла. Але такіх дзяржаўных арганізацый для прыёмкі адлоўленых дзікіх птушак няма. Ёсць прыватныя ініцыятывы, дзе селяцца птушкі, або месца, дзе іх могуць узяць на ператрымку. Напрыклад, у Дзяржынскім раёне ёсць цэнтр рэабілітацыі птушак і звяроў «Сірын». Працуе таксама цэнтр экалагічнага турызму «Станькава».