Стральба ў Страсбургу: нападнік крычаў «Алах Акбар»
- 12.12.2018, 15:14
- 7,190
Французская пракуратура пацвердзіла тэрарыстычную падаплёку нападу.
Пра гэта заявіў генеральны пракурор Парыжу Рэмі Хейц, паведамляе BFMTV.
З ягоных слоў, на ісламісцкі след нападу паказвае характар «мэты атакі, спосаб ажыццяўлення і твар выканаўцы», піша "Европейская правда".
Ён таксама паведаміў аб сведчанні відавочцаў, са слоў якіх, падчас нападу зламыснік крычаў «Алах Акбар».
Са слоў пракурора, следства пачалі на падставе артыкулаў «забойства і спроба забойства з тэрарыстычнай мэтай ад імя тэрарыстычнай арганізацыі».
«Расследаванне толькі пачалося», - падкрэсліў Хейц.
Ён таксама пацвердзіў затрыманне чатырох падазраваных у сувязі з нападам.
Як паведамлялася, у выніку ўчорашняга нападу на Калядным кірмашы ў Страсбургу загінулі тры чалавекі, 8 атрымалі сур'ёзныя раненні і яшчэ 5 - лёгкія раненні.
Пасля нападу зламыснік сеў у таксоўку і сказаў кіроўцу, што толькі што забіў некалькіх людзей. Праваахоўнікі цяпер шукаюць нападніка.