Віктар Бабарыка: Нуль для беларускіх чыноўнікаў - гэта досыць

Кіраўнік «Белгазпрамбанка» быў шакаваны, калі даведаўся пра адную з пастаноў уладаў.

Выданне пяцітомніка «Галасы ўтопіі» на беларускай мове - самы паспяховы праект у гісторыі краўдфандынга ў Беларусі. Падчас кампаніі было сабрана 110 тысяч даляраў у эквіваленце. «Белгазпрамбанк» замовіў 15 000 асобнікаў кніг Святланы Алексіевіч для бязвыплатнай перадачы ў абласныя і раённыя бібліятэкі ва ўсёй краіне.

Першымі атрымалі падарункі бібліятэкі Віцебска і Віцебскай вобласці, а таксама Менска і Менскай вобласці. Гародні і Берасця ў адказ на прапанову банка паведамілі, што ў кнігах Алексіевіч не маюць патрэбы. «Салідарнасць» стэлефанавалася з кіраўніцтвам бібліятэк і задала простае пытанне: чаму яны адмаўляюцца ад кніг нобэлеўскай лаўрэаткі.

Адказы здзівілі. Некаторыя кіраўнікі спасылаліся на тое, што не прымаюць такія пастановы самастойна, і ківалі на вышэйшае начальства - ідэолагаў. Тыя, у сваю чаргу, не змаглі даць выразны адказ, бо «не даюць каментары праз тэлефон» або не валодаюць сітуацыяй.

Кіраўніцтва Белгазпрамбанка дагэтуль не каментавала вынікі кампаніі #NobelNaMove. 20-га снежня падчас прэс-канферэнцыі на пляцоўцы ulej.by Віктар Бабарыка прызнаўся, што быў шакаваны, калі даведаўся, што бібліятэкам трох абласцей краіны (Гарадзенскай, Берасцейскай і Магілёўскай), кнігі Святланы Алексіевіч не патрэбныя, бо іх дастаткова.

- Мы даведаліся, што нуль для беларускіх чыноўнікаў - гэта дастаткова. Я ніколі не думаў, што падарунак можа быць непатрэбны. Хоць бы з ветлівасці людзі звычайна бяруць і кудысьці хаваюць надоўга...

Старшыня ўправы «Белгазпрамбанка» падкрэсліў, што гэта было першае такое выданне нобэлеўскай лаўрэаткі - пяцітомнік на беларускай мове.

- Мы былі рэальна ў шоку, - сказаў Віктар Бабарыка, дадаўшы, што і ён, і ягоныя калегі ў банку моцна разгубіліся, атрымаўшы адмову. - Чаму не трэба - задаваць пытанні няма каму і няправільна.

Паводле ягоных слоў, «Белгазпрамбанк» успрыняў гэтую сітуацыю як выклік. У выніку была прынятая пастанова праверыць, можа быць, у Беларусі ёсць людзі, якім нічога не трэба. У адказ банк запусціў краўдкампанію аб распаўсюджванні кніг сярод бібліятэк трох абласцей, «кіраўніцтва якіх мяркуе, што нуль - гэта дастаткова».

- На сайце lib.artbelarus.by кожны прадстаўнік бібліятэкі гэтых абласцей можа замовіць тую колькасць камплектаў, якую ён уважае за патрэбную для сваёй бібліятэкі, - распавёў Віктар Бабарыка. - Чытачы гэтых бібліятэк таксама могуць прапанаваць зрабіць замову іх супрацоўнікам.

На думку Бабарыкі, гэтая кампанія пакажа, ці патрэбныя людзям кнігі Алексіевіч. Магчыма, мяркуе ён, мы ўбачым тое, што часта назіраем: разрыў паміж жаданнем людзей і разуменнем гэтых жаданняў улады, якая чамусьці мяркуе, што непатрэбныя бібліятэкам Беларусі кнігі нобэлеўскай лаўрэаткі, выдадзеныя на роднай мове.

- У нас засталося крыху больш за 600 камплектаў. Атрымаецца - добра. Не атрымаецца - у кожным выпадку мы знойдзем ім выкарыстанне, - дадаў банкір, удакладніўшы, што замовіць кнігі могуць толькі супрацоўнікі бібліятэк.