На Гарадзеншчыне актывіст дамогся забароны на расейскія «трыкалоры» ў транспарце

Барацьбу Валерый Мінец пачаў яшчэ ў верасні.

Кіроўцам аўтобусаў «Гроднааблаўтатранс» забаранілі вешаць у кабіне грамадскага транспарту «непатрэбныя прадметы», да якіх можна аднесці і расейскі «трыкалор». Такога выніку дамогся сваімі зваротамі і скаргамі лідскі актывіст Валер Мінец, паведамляе «Радыё Свабода».

Кіроўцу пазбавілі прэміі праз скандал вакол сцяга

Барацьба Валерыя Мінца з расейскімі сцяжкамі ў Лідзе пачалася ў верасні. Ён заўважыў у адным з гарадскіх аўтобусаў на лабавой шыбе «трыкалор». Папрасіў кіроўцу Івана Пышынскага зняць яго.

Ён уважае за недапушчальнае і незаконнае размяшчэнне сімвалаў іншых дзяржаў у месцах грамадскага карыстання.

Кіроўца адмовіўся, са слоў Мінца, у грубай і абразлівай форме. Актывіст напісаў скаргу ў аўтобусны парк з просьбай прыбраць расейскія сцягі і прыцягнуць кіроўцу да адказнасці за хамства.

У выніку кіроўцу пазбавілі паловы месячнай прэміі. Аднак пытанне з сімволікай тады не развязалася.

Забаранілі ўсе «лішнія» прадметы ў транспарце

Другі зварот з такой жа просьбай жыхар Ліды накіраваў у «Гроднааблаўтатранс» - забараніць вешаць у транспарце расейскія сцягі і іншую сімволіку.

«Пры павазе ўласных поглядаў і прыхільнасцяў кіроўцаў, дзяржаўны грамадскі транспарт не павінен быць месцам выказвання і прапаганды тых самых уласных поглядаў кіроўцаў гэтага аўтатранспарту, у тым ліку праз выкарыстанне чужой сімволікі», - пісаў ён у лісце.

З ААТ «Гроднааблаўтатранс» ён атрымаў станоўчы адказ. Гэтая арганізацыя 7 снежня выдала загад, які «абавязаў дырэктараў філіялаў выключыць усталяванне (прымацаванне) у транспартных сродках прадметаў, не прадугледжаных канструкцыяй аўтамабіля».

Выключэнні - сродкі навігацыі і відэорэгістрацыі, бартавыя прылады платы за праезд, фіранкі на бакавых вокнах салона аўтобуса і «іншыя прадметы, неабходныя для ажыццяўлення кантролю, гарантавання бяспекі і камфорту пасажыраў, распаўсюджвання ўзгодненай ва ўстаноўленым парадку інфармацыі».

Валерый Мінец мяркуе, што сцягі да выключэнняў не належаць.

Год таму лідскі актывіст дамогся, каб з гарадскога транспарту ў Лідзе зніклі «георгіеўскія стужкі». Ён сказаў, што пасля гэтага больш ні разу не бачыў «георгіеўскія стужкі» ў лідскіх аўтобусах.