22-і ўкраінскі марак абвясціў сябе ваеннапалонным

Пра гэта паведаміў адвакат украінскага марака.

Украінскі вайсковец, супрацоўнік Службы бяспекі Украіны Андрэй Драчоў, захоплены блізу Керчанскай пратокі 25 лістапада, заявіў, што з'яўляецца ваеннапалонным. Аб гэтым 25 снежня ў Facebook паведаміў ягоны адвакат Арцём Пепа.

Паводле ягоных слоў, марак адмовіўся ад давання сведчанняў расейскаму следству.

"Пачуваецца добра, усім валанцёрам пераказвае падзяку за дапамогу, настрой мае пазітыўны! Родным і блізкім пераказвае вялікае вітанне, спадзяецца на хуткае вяртанне дадому", - напісаў ён.

Андрэй Драчоў стаў 22-м украінскім мараком, які абвясціў сябе ваеннапалонным.

25 лістапада РФ абстраляла і захапіла ў Чорным моры катэры ўкраінскіх ВМС "Бярдзянск" і "Нікапаль", а таксама буксір "Яны Капу", якія вярталіся ў Адэсу пасля спробы прайсці праз Керчанскую пратоку ў Азоўскае мора.

Расейскія вайскоўцы затрымалі 24 ўкраінскіх маракоў, пазней іх арыштавалі ў крымскіх "судах" і перавезлі ў Маскву. Траіх параненых украінцаў змясцілі ў шпіталь следчага ізалятара "Матроская цішыня", астатніх даставілі ў ізалятар "Лефортава".

Усім маракам выставілі абвінавачванні паводле ч.3 арт.322 (незаконнае перасячэнне мяжы) Крымінальнага кодэкса Расеі.

ЗША асудзілі дзеянні Расеі, назваўшы іх з’явай агрэсіі, Еўразвяз выказаў заклапочанасць ужываннем сілы з боку РФ. Заявы з патрабаваннем вызваліць украінскіх маракоў апублікавалі таксама NATO і АБСЕ.

Упаўнаважаная Вярхоўнай Рады Украіны ў правах чалавека Людміла Дзянісава паведамляла, што затрыманыя РФ украінскія маракі маюць статус ваеннапалонных, які прадугледжвае асобную мадэль вызвалення.