Неўраджай: Беларусі давядзецца закупіць да 700 тысяч тон збожжа
29- 5.12.2018, 17:29
- 23,518
«Бітва за ўраджай» прайграная?
Беларусь у 2019 годзе можа закупіць да 700 тысяч тон збожжа па імпарту для патрэб жывёлагадоўлі ў сувязі з недаборам уласнага ўраджаю.
«Мы недаатрымалі за 1,8 млн тон збожжа да ўзроўню мінулага года», - паведаміў намеснік міністра сельскай гаспадаркі і харчавання Уладзімір Гракун журналістам у сераду ў Менску, паведамляе «Інтэрфакс».
Як удакладніў намеснік міністра, патрэбу ў імпарце збожжа будуць адчуваць галоўным чынам прадпрыемствы птушкагадоўчай і свінагадоўчай галін.
«Паводле іх звестак, амаль 1 млн тон (патрэба ў дадатковых закупах збожжа - заўв.). Але з улікам наяўнасці дзяржрэзерву, і мы з яго выдаём дзесьці 600-700 тысяч тон (неабходна імпартаваць - заўв.)», - сказаў В.Гракун.
Пастаўшчыкі будуць вызначаныя ў выніку конкурсаў. Пры гэтым прадстаўнік Мінсельгасхарча не выключыў, што яны могуць быць праведзеныя цэнтралізавана аблвыканкамамі.
Намеснік міністра адзначыў, што неабходнасці ў імпарце харчовага збожжа не будзе. «Мы поўнасцю забяспечаныя харчовым збожжам. Усе будуць забяспечаныя і мукой, і крупамі, і хлебабулачнымі вырабамі», - падкрэсліў ён.
Як паведамлялася, першапачаткова ў 2018 годзе ва ўсіх катэгорыях гаспадарак Беларусі валавы збор збожжа планаваўся на ўзроўні 9 млн тон, у тым ліку ў сельгасарганізацыях - 8,3 млн тонаў.
У той жа час, засуха ў траўні і чэрвені гэтага года, а таксама складаныя варункі для жніва ў другой палове ліпеня прывялі да істотнага недабору збожжа.
Паводле звестак Мінсельгасхарча, збор збожжа з улікам кукурузы сёлета склаў усяго 6,7 млн тон.