Суд над Змітром Паліенкам перанеслі

Актывісты сабраліся ля будынка суда, каб падтрымаць былога палітвязня.

Суд над былым палітвязнем Змітром Паліенкам перанесены. Каля будынку суду Кастрычніцкага раёну Менску сабраліся актывісты «Еўрапейскай Беларусі» і Беларускага Нацыянальнага Кангрэсу.

Пра гэта паведамляе тэлеграм-канал «Баста».

«Замест гэтага прыбылі супрацоўнікі міліцыі і паспрабавалі забараніць журналістам відэаздымку. Не атрымалася. Прыйшлося абмежавацца перапісваннем звестак некаторых актывістаў.

Пры гэтым супрацоўнікі міліцыі заявілі, што відэаздымка ці то дыскрымінуе ці то дыскрэдытуе іх і міністра Шуневіча», - гаворыцца ў паведамленні.

Нагадаем, што Зміцер Паліенка выйшаў на свабоду больш за месяц таму і павінен быў амаль штодня з'яўляцца ў Заводскім РАУС, каб слухаць лекцыі, якія тычыліся працаўладкавання. Некалькі разоў экс-палітвязень прыйшоў на лекцыі, а затым адмовіўся гэта рабіць прынцыпова.

У сваім звароце ў пракуратуру актывіст паказаў, што дзеянні супрацоўнікаў міліцыі незаконныя, ніхто не мае права прымушаць яго да працы. Штодзённыя выклікі на лекцыі - гэта таксама неабгрунтаваны кантроль і парушэнне правоў і свабод.

«Не мінуў і першы суд, як далі позву на другі, - паведаміў Зміцер ў сацыяльных сетках. - Я ўжо казаў пра сваё стаўленне да гэтых лекцый і пра тое, чаму я на іх не хаджу і не збіраюся надалей хадзіць. Я не збіраюся скакаць пад дудку тых, хто мяне кінуў за краты і не збіраюся быць у іх на вудзе».

Зміцер Паліенка дадаў, што пратаколы на яго складзеныя паводле артыкула 23.4 («Непадпарадкаванне законнаму патрабаванню супрацоўніка міліцыі»).

«Першы суд - 6 снежня, другі - 19 снежня, - кажа ён. - Не ведаю, які будзе прысуд, але такая актыўнасць міліцыі насцярожвае. Відавочна, да маёй асобы ў іх нейкі асаблівы інтарэс».