Буйному расейскаму банку пагражае адключэнне ад сістэм Visa і MasterCard

Цэнтрабанк РФ разаслаў ліст аб наступствах амерыканскіх санкцый.

Па меры таго, як набліжаецца студзень, калі кангрэс ЗША адновіць разгляд санкцыйных законапраектаў, расейскі ЦБ пачынае рыхтавацца да жорсткіх сцэнароў, аж да адключэння аднаго з банкаў ад міжнародных аплатных сістэм, піша finanz.ru.

Як паведамляюць «Ведомости», цэнтрабанк разаслаў удзельнікам банкаўскага рынку ліст з рэкамендацыяй ужыць прэвентыўныя захады на выпадак, калі банк-партнёр, праз які яны працуюць з сістэмамі Visa і MasterCard, будзе вымушаны прыпыніць аперацыі.

ЦБ навучаны горкім досведам Майстар-банка, які забяспечваў працэсінгавыя паслугі па картках для дзясяткаў банкаў на рынку: пасля адклікання ліцэнзіі дробныя гульцы прастаялі некалькі тыдняў, а некаторыя былі вымушаныя зусім сысці з аплатнага бізнэсу.

Цяпер найбуйнейшыя спонсары банкаў для ўдзелу ў аплатных сістэмах - гэта РНКА «Аплатны цэнтр», «Уралсіба», Расбанк, ВТБ і Прамсувязьбанк. Два апошнія ўключаныя ў закон «Аб супрацьдзеянні ворагам Амерыкі» як патэнцыйныя кандыдаты для банкаўскіх санкцый.

Прычым Прамсувязьбанк пасля нацыяналізацыі ў снежні 2017 года ператвораны ў апорны банк для абслугоўвання абароннага сектара, які ў сваю чаргу знаходзіцца пад татальнымі санкцыямі з лета мінулага года.

Згодна з законам СAATSA, падпісаным Дональдам Трампам у жніўні 2017-га, банкам, уцягнутым у «істотныя транзакцыі» з расейскімі абароннымі прадпрыемствамі і структурамі, звязанымі з войскам і выведкай, пагражае ўключэнне ў спіс SDN (Specially Designated Nationals And Blocked Persons List).

Менавіта ад магчымых санкцый, якія могуць быць адключэныя ад Visa і Mastercard, як гэта адбывалася ў 2014-15 гг, і страхуецца ЦБ, мяркуюць банкіры.

У лісце ён рэкамендуе знайсці рэзервовага спонсара, укласці з ім дамову і пратэставаць магчымасць інтэграцыі.

Пад пагрозай санкцый ЗША знаходзяцца адзін ці два расейскія банкі - такі сцэнар абмяркоўваецца ў Вашынгтоне, паведаміў на сустрэчы з заможнымі кліентамі ў пачатку снежня кіраўнік «Ашчадбанка» Герман Грэф.

З ягоных слоў, «ніводзін з буйных банкаў» пад удар не трапляе, але ў далейшым сітуацыя можа змяніцца.

«Да чаго мы падыдзем у сакавіку-красавіку, калі яны абяцаюць разглядаць гэтае пытанне, ведае толькі адзін Гасподзь Бог», - заявіў Грэф.