У Беластоку прадаюць аўто, канфіскаваныя ў беларускіх кантрабандыстаў

Польскія памежнікі выставілі на таргі беларускія аўто, канфіскаваныя за вялікую кантрабанду цыгарэт.

Кошты аўто не саромеліся ставіць нізкімі. Нават з улікам мыты амаль новую Mazda 6 выгадна забраць назад у Беларусь, адзначае AutoGrodno. Але варта ведаць, што аўто перажылі паглыблены дагляд, які часам мае на ўвазе разбор элементаў салона і кузава.

Найбольш цікавым у гэтых аб'явах, вядома ж, з'яўляецца кошт. Мінівэн Citroen Jumpy 2007 года выпуску з рухавіком 2,0 D палякі ацанілі на 800 даляраў ЗША. У Беларусі кошт такога ў 10 разоў вышэйшы: ад 8 000 даляраў. На сайтах аб'яваў палякі прадаюць такія Citroen за 5000 даляраў.

Вядома, у канфіскаванага аўтамабіля засталіся сляды пасля паглыбленага надгляду памежнай службай. Да прыкладу, у аўтамабіля адсутнічаюць некаторыя элементы інтэр'еру: пластыкавыя ўстаўкі на дзвярах і цэнтральнай кансолі, абарваная абшыўка столі, сарваная ашалёўка на задніх дзвярах і ў багажным адсеку. Да аўто можна было б прыгледзецца і беларусу, але мыта неапраўдана высокая: 9600 еўра.

Седан Mazda 6 (2016 года выпуску) з бензінавым рухавіком Skyactiv-G аб'ёмам 2.0 літра і аўтаматычнай каробкай перадач ацанілі ўсяго на 3 500 даляраў. Такі аўтамабіль у Беларусі каштавацьме ў 6 разоў даражэй: ад 20 000 даляраў. На польскіх жа аўтарынках мадэль прадаецца коштам ад 17 000 даляраў.

На жаль, балгарка афіцэраў не пашкадавала яшчэ гарантыйны аўтамабіль. У салоне Mazda6 таксама папрацавалі старанна, але ў асноўным дэмантавалі ашалёўку падлогі. У нас мыта на гэты аўтамабіль каштавацьме 5000 еўраў, а ўлічваючы нізкі стартавы кошт, аўтамабіль выгадна купіць будзе нават беларусу. Можна ўявіць здзіўленне памежнікаў, калі аўто зноў пачне перасякаць мяжу.