Надзея Скардзіна: Нас натхніў залаты медаль Ганны Гуськовай

Беларуская біятланістка падзялілася сваімі ўражаннямі пасля мас-старту ў Пхенчхане.

Надзея Скардзіна, якая заняла 7-е месца ў мас-старце на Гульнях у Пхенчхане, у інтэрв'ю прэс-службе НАК адзначыла, што ўчорашняе золата фрыстайлісткі Ганны Гуськовай натхніла біятлонную каманду, піша tut.by.

- Сёння я змагла адстраляцца чыста і паказаць усё, на што я здольная. Гэта быў максімум, я змагалася да канца, нешта не атрымалася. Тым не менш для мяне гонка прайшла паспяхова. Была вельмі цікавая барацьба, усё было блізка і добра відаць. На апошнім коле Даша мяне яшчэ больш натхніла, калі я ўбачыла, што яна едзе па медаль, - сказала Надзея Скардзіна.

Надзея таксама распавяла пра тое, што лыжы ехалі добра і ход быў нядрэнным, але ёй не выстарчыла хуткасці ў працы на агнявых рубяжах.

- Нас ўчора натхніў залаты медаль Ганны Гуськовай у фрыстайле. Мы ўчора заўзелі за нашых лыжных акрабатак і вельмі былі радыя, што Ганна змагла ўзяць медаль, - дадала біятланістка.