Міністэрства фінансаў ЗША анансавала новыя санкцыі супраць РФ

Пра новыя санкцыі будзе абвешчана на працягу некалькіх тыдняў.

Міністэрства фінансаў ЗША працуе над падрыхтоўкай новых санкцыяў у дачыненні да Расеі і мае намер абвясціць пра іх на працягу некалькіх тыдняў.

Пра гэта паведаміў у пятніцу на брыфінгу для журналістаў міністр фінансаў ЗША Стывен Мнучын, паведамляе tut.by cа спасылкай на ТАСС.

«Мы працуем над санкцыямі ў дачыненні да РФ. Я магу вас запэўніць, што яны ў працы, і я вярнуся сюды на працягу найбліжэйшых некалькіх тыдняў, каб пагаварыць пра іх», - сказаў ён.

«Я б хацеў падкрэсліць, што ў рамках раздзела 241 (Закона «Аб супрацьдзеянні апанентам Амерыкі праз санкцыі») мы падрыхтавалі два даклады: сакрэтны і несакрэтны. І, як я неаднаразова казаў, мы рыхтуем санкцыі ў якасці дадатку да іх», - растлумачыў Мнучын.

Кіраўнік амерыканскага ведамства таксама дадаў, што Міністэрства фінансаў разгледзіць увядзенне санкцый на падставе матэрыялаў Міністэрства юстыцыі, звязаных з высунутымі нядаўна супраць 13 расейцаў абвінавачваннямі ў спробах умяшацца ў амерыканскія выбары.

«Мы працягваем разбірацца з умяшаннем у выбары. Мы цесна працуем з ФБР паводле інфармацыі што да апошняга пазову. І, як і мае быць, мы разгледзім увядзенне санкцый супраць асоб на аснове звестак, якія ў іх [Мінюста ЗША] ёсць», - сказаў ён.

Мнучын таксама пацвердзіў, што ў Мінфіне працуюць над санкцыямі на падставе «крамлёўскага спісу». Ён быў раней складзены міністэрствам, у яго ўвайшлі кіраўніцтва адміністрацыі прэзідэнта РФ, старшыні Дзярждумы і Савета Федэрацыі, увесь склад расейскага ўрада і буйныя прадпрымальнікі.

Амерыканскія ўлады 16 лютага выставілі афіцыйныя абвінавачанні 13 грамадзянам і 3 арганізацыям у Расеі за нібыта дачыненне да ўмяшання ў амерыканскія прэзідэнцкія выбары 2016 года. Паводле дакументаў Мінюста, супрацоўнікі расейскай арганізацыі «Агенцтва інтэрнэт-даследаванняў» у 2014 годзе «пачалі аперацыі па ўмяшанні ў палітычную сістэму ЗША, уключаючы амерыканскія прэзідэнцкія выбары 2016 года». Пры гэтым улады ЗША адзначаюць, што гэтыя дзеянні не паўплывалі на вынік выбараў.

Абвінаваўчую выснову супраць 13 грамадзян РФ і трох расейскіх арганізацый, якая складаецца з 37 старонак, падрыхтаваў апарат спецыяльнага пракурора Роберта Мюлера.

Закон «Аб супрацьдзеянні апанентам Амерыкі праз санкцыі» прэзідэнт ЗША Дональд Трамп падпісаў 2 жніўня мінулага года. Дакумент прадугледжвае ўзмацненне жорсткасці санкцый у дачыненні да Расеі, Ірана і КНДР і перасцерагае амерыканскія і замежныя кампаніі ад укладання пагадненняў супрацоўніцтва або кантрактаў з расейскімі прадпрыемствамі і ведамствамі з «абароннага і разведвальнага сектараў».

Міністэрства фінансаў ЗША 29 студзеня апублікавала адкрытую версію так званага крамлёўскага спісу, у які былі ўнесены ўсе сябры расейскага ўрада, кіраўніцтва прэзідэнцкай адміністрацыі, кіраўнікі шэрагу дзяржаўных карпарацый і банкаў, а таксама бізнэсоўцы з багаццем, якія перавышаюць, паводле звестак амерыканскіх крыніц, $1 млрд.