У бары заявілі, што установа не разлічаная на людзей з абмежаванымі магчымасцямі.
Беларуску Аляксандру Чычыкаву, якая ў мінулым годзе перамагла на конкурсе Міс свету на інвалідным вазку, не пусцілі ў бар «Туманы» на вуліцы Зыбіцкая ў Менску. Пра гэта дзяўчына распавяла ў сваім Instagram. У «Туманах» у сваю чаргу belsat.eu заявілі, што іх бар наогул не разлічаны на людзей з абмежаванымі магчымасцямі.
Чычыкава прыйшла ў бар у кампаніі сяброў, аднак ахова заявіла, што дзяўчыну не пусцяць дзеля яе ж бяспекі - па-першае, бар знаходзіцца ў падвальным памяшканні, а, па-другое, там «шмат п'яных людзей». Мэнэджар бара заявіў, што гатовы прапусціць Міс свету толькі ў выпадку, калі яе сябры бяруць усю адказнасць на сябе.
«Мой сябар падняў мяне на рукі, іншы сябар узяў вазок. Першую частку прыступак мы прайшлі, абарочваюся - вазка і сябра няма. Паднімаемся зноў наверх. І вось што адбылося. Падымаючы вазок, а другой рукой адкрываючы дзверы (ахова нават не адкрыла дзверы, не прапанавала дапамогу - яны проста глядзелі) мой сябар паслізнуўся і ўпаў разам з вазком», - піша Чычыкава.
Пасля гэтага мэнэджар заявіў Чычыкавай, што яе сябар знаходзіцца ў нецвярозым стане і праз яго нікога ў бар не пусцяць.
«Нашая краіна прыняла Канвенцыю аб правах людзей з інваліднасцю, прыняла дакумент аб «17 мэтах устойлівага развіцця». Гэта грандыёзныя падзеі, аднак я сутыкаюся з тым, што мяне не пускаюць ва ўстановы дзеля маёй жа бяспекі. Я хачу адпачываць, наведваць розныя месцы, але от жа халера, гэта небяспечна!» - абураецца дзяўчына.
Карэспандэнт belsat.eu патэлефанаваў у «Туманы», мэнэджарка якога патлумачыла, што бар наогул не разлічаны на людзей з абмежаванымі магчымасцямі:
«У нас няма адмысловага спуску. У нас высокія барныя стойкі і крутая лесвіца (бар знаходзіцца ў падвальным памяшканні). Побач на Зыбіцкай у нас ёсць яшчэ адзін бар - Don Coffe'on - і калі б яна пайшла туды, то ніякіх праблем не ўзнікла б».
