«Ъ»: У Екацярынбургу хочуць скасаваць выбары мэра, каб пазбавіцца ад апазіцыянера Ройзмана
6- 21.03.2018, 11:16
- 19,203
Мэр Яўген Ройзман - сапраўдная праблема для Пуціна.
Найбліжэйшым часам у Заканадаўчы сход Свярдлоўскай вобласці ўнясуць законапраекты аб скасаванні наўпроставых выбараў мэра рэгіянальнай сталіцы Екацярынбурга і новай сістэмы фармавання гарадской думы, піша «Коммерсант» у аўторак, 20 сакавіка, са спасылкай на неназваныя крыніцы
Як зменяцца выбары мэра Екацярынбурга
Паводле паправак, якія хочуць унесці ў рэгіянальнае заканадаўства, мэр Екацярынбурга будзе абірацца гарадскімі дэпутатамі, сцвярджае суразмоўца газеты. Пры гэтым дэпутаты змогуць выбіраць толькі з кандыдатаў, прапанаваных конкурснай камісіяй.
Цяпер у горадзе двухгаловая сістэма. Мэра, які кіруе гарадской думай, выбіраюць на ўсенародных выбарах на пяць гадоў. Сіці-мэнэджэра, які ўзначальвае гарадскую адміністрацыю, наймаюць праз конкурс.
Праз папраўкі, якія пралабіяваў тагачасны губернатарам Свярдлоўскай вобласці Аляксандр Мішарын, з 2010 года ў мэра Екацярынбурга амаль няма рэальнай выканаўчай улады - у асноўным ён выконвае прадстаўнічыя функцыі.
На апошніх выбарах у 2013 годзе перамог апазіцыянер Яўген Ройзман. Чарговыя выбары мэра павінны адбыцца ў верасні, але, калі папраўкі прымуць, іх скасуюць.
Падчас рэформы 2014 года заканадаўчаму сходу рэгіёнаў перадалі права выбіраць схему фармавання муніцыпальнай улады. Дагэтуль гэтым правам валодалі муніцыпальныя дэпутаты. Пасля рэформы ў Расеі значна скарацілася колькасць гарадоў з наўпроставымі выбарамі мэра.
Выбары мэраў захаваліся толькі ў 8 з 80 рэгіянальных цэнтраў: Екацярынбургу, Новасібірску, Хабараўску, Томску, Кемерава, Анадырэ, Абакане і Якуцку. Акрамя таго, выбарнымі застаюцца пасады мэра Масквы і губернатара Пецярбурга.
Як зменяцца выбары гарадскіх дэпутатаў Екацярынбурга
Папраўкі, якія хочуць прыняць рэгіянальныя ўлады, знізяць колькасць дэпутатаў гарадской думы, якія выбіраюцца з партыйных спісаў - з 18 да 10. Калі іх прымуць, то на выбарах у верасні гэтага года новы склад гарадской думы на наступныя пяць гадоў абяруць ўжо паводле новых правіл.
У екацярынбуржскай думе 36 дэпутатаў. Палова з іх абіраецца з партыйных спісаў, палова - праз аднамандатныя акругі. Цяпер большасць, 21 месца, у кіроўнай партыі «Адзіная Расея».