БРСМ пачаў шукаць «дармаедаў» у сацсетках

«Лукамольцам» нават далі базу звестак з адрасамі беспрацоўных менчукоў.

БРСМ узяўся за непрацуючую моладзь. Цяпер у гаркаме саюза арганізаваны штаб з валанцёрамі, якія будуць шукаць месцы для беспрацоўных да 31 года. На днях «лукамольцы» правялі кірмаш вакансій, а студэнты БДУІР стварылі дастасаванне для пошуку працы. Tut.by паглядзеў, як працуе штаб, і даведаліся, як шмат людзей пакінулі на кірмашы вакансій свае рэзюмэ.

Чым адрозніваецца кірмаш вакансій БРСМ ад агульнагарадскага

Кірмаш вакансій, які арганізаваў БРСМ, праходзіў у гаркаме саюза моладзі на Кісялёва, 24. У адным кабінеце ад студэнтаў прымалі анкеты для працы ў студатрадах. У іншым — праводзілі невялікія гутаркі 13 прадстаўнікоў розных сталічных прадпрыемстваў і прапаноўвалі па 15-20 вакансій. У гэтай зале было зусім нешматлюдна. З нашых назіранняў, за гадзіну прыйшоў да 10 чалавек.

Наймальнікі засталіся не вельмі задаволеныя. Кажуць, што людзей мала, а прыходзяць у асноўным студэнты і шукаюць падпрацоўку.

Напрыклад, праз дзве гадзіны пасля пачатку працы кадравікі з гатэля «Пекін» сышлі, так і не знайшоўшы ніводнага падыходнага суіскальніка.

— Тут не наш кантынгент, усе шукаюць падпрацоўку. А мы шукаем людзей для сталай працы і з афіцыйным працаўладкаваннем. Бо ў нас кангрэс-гатэль, праводзяцца мерапрыемствы высокага ўзроўню. Таму часовае працаўладкаванне нам не падыходзіць. Звычайна на кірмашах людзей вельмі шмат, а сёння нават пасада афіцыянта нікога не зацікавіла.

Астатнія наймальнікі кажуць, што ў найлепшым выпадку 10 чалавек за дзве гадзіны працы цікавіліся вакансіямі. Прыходзяць на кірмаш студэнты або людзі без досведу работы і сярэдняй спецыяльнай або вышэйшай адукацыі.

— Слабы кірмаш, людзей практычна няма, у асноўным тут студэнты, якім патрэбная падпрацоўка, ці школьнікі без кваліфікацыі і адукацыі. Нам гэта не падыходзіць, — рэзюмуюць яны.

Як беспрацоўных знойдуць у сацсетках і навошта за імі замацоўваць валанцёра

У гаркаме БРСМ працуе таксама штаб, які з нядаўніх часоў займаецца пошукам працоўных месцаў для беспрацоўнай моладзі. Узрост тых, каму прапануюць працу, — ад 14 да 31 года. Праўда, метады БРСМ могуць здацца з боку дакучлівымі.

Алгарытм працаўладкавання маладзёнаў наступны. Усе беспрацоўныя менчукі ёсць у базе, якой валодае саюз моладзі. Валанцёры штаба БРСМ выбіраюць беспрацоўных да 31 года. Ад даведачнай службы «Белтэлекама» яны атрымліваюць тэлефоны сваіх пратэжэ. Абзвоньваюць іх або шукаюць у сацыяльных сетках, каб паведаміць аб тым, што гатовыя дапамагчы знайсці працу, і прапануюць адкрытыя вакансіі з базы камітэта працы Менгарвыканкама.

— Калі чалавек не хоча, то ніяк аргументаваць сваю адмову не трэба. Мы стварылі гэты штаб для таго, каб дайсці да кожнага беспрацоўнага маладзёна. Наша задача — прапанаваць працу, якая адпавядае магчымасцям, выкарыстоўваючы ўсе сучасныя метады, — кажа першы сакратар Менскага гаркама БРСМ Сяргей Клішэвіч.

Валанцёр патрэбен для таго, каб дапамагчы суіскальнікам з месцам працы, кантактамі, юрыдычнай кансультацыяй. Ён сам патэлефануе на прадпрыемства і прапануе суіскальніка, удакладніць, ці ўладкаваўся чалавек у выніку ці не. Ці не занадта патэрналісцкі падыход?

— Моладзь цяпер актыўная, але ёсць і тыя, хто не хоча далёка хадзіць. Сёння вельмі шмат маладзёнаў, якія могуць працаўладкавацца, але ёсць тыя, каму патрэбная дапамога. Яны ўжо скончылі вышэйшую навучальную ўстанову, але паводле дзяржаўных базаў яны непрацаўладкаваныя. Мы проста хочам прапанаваць ім дапамогу, можа, яны трапілі ў нейкую цяжкую жыццёвую сітуацыю.

Камандзір штаба дапаўняе выказванне Клішэвіча і кажа, што часта знайсці працу дапамагаюць інвалідам і людзям, у якіх няма сярэдняй спецыяльнай і вышэйшай адукацыі.

У БРСМ спадзяюцца такім чынам працаўладкаваць хоць бы 20% ад колькасці тых, каму будуць прапаноўваць вакансіі.

Суіскальнікі: «Не магу лёгка ўладкавацца на працу» і «Пакінула тры рэзюмэ»

Такая актыўнасць БРСМ пакуль распаўсюджваецца толькі на менчукоў. Калі ўсё будзе добра, то праект прапануюць і рэгіёнам. Мы пагутарылі з некалькімі прэтэндэнтамі.

Піліпу 21 год, ён прыйшоў з сябрам на кірмаш вакансій і атрымаў накіраванне на МТЗ.

— Трэба будзе прыехаць на прадпрыемства і на месцы пагутарыць аб тым, што нам змогуць прапанаваць. Але пакуль тое, што я пачуў, мне падыходзіць. Справа ў тым, што мне нялёгка працаўладкавацца на працу — у мяне абмежаванне волі без накіравання ў папраўчую ўстанову. Таму я гатовы да ўсяго.

Іншай суіскальніцы, Але, 30 гадоў. Яна шукае працу два тыдні.

— Па спецыяльнасці я інжынер-энэргетык. Два месяцы таму звольнілася з працы. Але пакуль знайсці нічога новага не магу. Без працы я дакладна не застануся. Я пакінула тут тры свае рэзюмэ. З адной кампаніяй у нас нават з'явілася ўзаемная цікавасць. Заробак на кірмашы пакуль што не абмяркоўваўся.

На выхадзе сустракаем дарослых мужчыну і жанчыну з анкетамі. Пенсіянерка — інжынер у ахове працы. Яе сваяк, з якім яна прыйшла на кірмаш, па адукацыі спецыяліст па маркетынгу.

— Мы ўзялі шмат візітовак. Будзем усіх абзвоньваць. Мерапрыемства для нас карыснае. Але куды хацелі трапіць, там не было вакансій. Але быццам на іншых прадпрыемствах прыдатныя варыянты — ЗЭПК, «Атлант», МТЗ. Нас цікавілі і працоўныя прафесіі, куды маладзён можа прыйсці без скарыначкі і без досведу. Але канкрэтна пакуль нічога не выбралі.