Беларуска выйграла ў ЗША конкурс на найлепшы клубнічны плакат

Сябраў журы скарыў плакат, створаны ўраджэнкай Беларусі.

Мастачка Наташа Айтуганава, якая эмігравала ў ЗША з Беларусі, выйграла конкурс на найлепшы плакат 35-га Каліфарнійскага фестывалю трускаўкі, які штогод праходзіць у горадзе Окснард, паведамляе belmir.by.

Усяго на разгляд журы было пададзена 58 работ. Але сябраў журы скарыў менавіта постэр, створаны ўраджэнкай Беларусі. Карціна створаная спалучэннем двух тэхнік - графікі і акварэлі. На ёй намаляваная ягада трускаўкі ў пырсках рознакаляровых фарбаў.

- Калі я пачала думаць над ідэяй плаката, то спытала сябе: «Што самае лепшае ў клубніцы?» І натуральна, адказам было «Яе смак». Пырскі фарбаў - гэта інтэрпрэтацыя тых выдатных адценняў смаку, якія мы адчуваем, калі ядзім гэтую ягаду, - патлумачыла Наташа.

Мастачка падала сваю працу на конкурс упершыню і атрымала ва ўзнагароду 2 тысячы даляраў прызавых. «Перамога прынесла цудоўнае пачуццё. Раней я ніколі не перамагала ў конкурсах. Гэта першы раз», - прызналася Айтуганава.

Яна - прафесійная мастачка, пісаць аддае перавагу ў асноўным тушшу і акварэллю. Пачала маляваць ва ўзросце 7 гадоў. Бацькі, заўважыўшы талент, неадкладна аддалі дачку ў мастацкую школу.

Наталля нарадзілася ў Беларусі, а ў 1993 годзе пераехала ў ЗША, жыве ў прыгарадзе Лос-Анжэлеса - Шэрман Оўкс. Прайшла навучанне па спецыяльнасці «мастак-пастаноўшчык» ў Амерыканскім інстытуце кінамастацтва.

- Мне падабаецца, што жыву там, дзе шмат трускаўкі. Гэта найлепшы ласунак майго дзяцінства. Бабуля гатавала яе для мяне са смятанай і цукрам, гэта была свайго роду традыцыя: талерка трускаўкі, талерка смятаны і талерка цукру, - распавяла яна.

Каліфарнійскі фестываль трускаўкі праходзіць на працягу двух дзён у траўні і ўключае ў сябе кірмаш, на якім дэманструецца адпаведная ягадная і сувенірная прадукцыя, з шырокай забаўляльнай праграмай.

Месца правядзення форуму не выпадковае. Окснард вырабляе прыкладна адну трэць трускаўкі ва ўсім штаце Каліфорнія. А сам штат - найбуйнейшы пастаўшчык гэтай ягады ў ЗША. Ён адказвае за 85 адсоткаў гэтай прадукцыі ў краіне.