Лукашэнка: «Дармаеды» будуць плаціць не толькі за ЖКГ
139- 10.04.2018, 12:44
- 128,859
Дыктатар распавёў, якія паслугі будуць цалкам аплачваць беспрацоўныя.
Праблема «дармаедаў» ёсць не толькі ў Беларусі, але і ў іншых краінах. Пра гэта Лукашэнка заявіў сёння на сустрэчы з кіраўнікамі і калектывамі найбуйнейшых дзяржаўных СМІ краіны, піша БелТА.
Правадыр адзначыў, што з развязаннем такой праблемы сутыкаюцца і ў іншых дзяржавах, напрыклад у Расеі. Дыктатар таксама падкрэсліў, што асноўная сутнасць дэкрэта №1 у тым, каб людзі працавалі і аплачвалі выкананыя дзяржавай паслугі - «у тым ліку ахову здароўя, ЖКГ».
- Хіба нармальна, калі паўмільёна чалавек невядома чым займаюцца? Боўтаюцца, а за наш кошт (дзяржавы. - Заўвага рэд.) атрымліваюць адукацыю, лечацца, карыстаюцца паслугамі ЖКГ, іх дзеці ходзяць у сады, школы. Мы ж за іх плацім. А колькі з гэтых людзей учыняюць злачынствы, і мы яшчэ велізарныя грошы выдаткоўваем на іх утрыманне ў турме, - цытуюць Лукашэнку дзяржаўныя СМІ.
Правадыр падкрэсліў, што ідэя дэкрэта ў тым, што за паслугі, якія атрымліваюць у Беларусі, трэба плаціць. У якасці «прыкладу» Лукашэнка падаў ЗША, дзе нібы блізу 50 мільёнаў чалавек, якія не маюць страхоўкі, «не могуць атрымаць медыцынскую дапамогу».
«Вось што галоўнае - прымусіць іх працаваць. І гэта была мая ідэя, мне яе ніхто не падказваў», - адзначыў правадыр, гаворачы аб ініцыяванні дэкрэта №1.
Нагадаем, раней урад вызначыў, хто будзе падпадаць пад дзеянне абноўленага дакумента па дармаедства - дэкрэта №1.
Пры гэтым яшчэ не зацверджаны канчатковы пералік паслуг якія людзі, што трапілі пад дзеянне дэкрэта №1, павінны будуць аплачваць поўнымі тарыфамі. Паводле апублікаванай учора пастановы Саўміна, гэта будуць жыллёва-камунальныя паслугі. Аднак пакуль невядома, якія канкрэтна. «Законапраект, які вызначае пералік гэтых паслуг, знаходзіцца на завяршальнай стадыі ўзгаднення», - паведаміў раней першы намеснік міністра працы і сацыяльнай абароны Андрэй Лабовіч.
Раней прагназавалася, што беларусы, якія падпадаюць пад дзеянне дэкрэта №1, будуць аплачваць эканамічна абгрунтаваным тарыфам жыллёва-камунальныя паслугі. Пры гэтым аб кампенсацыі выдаткаў на медыцынскую дапамогу гаворка не ідзе, заяўляў міністр аховы здароўя Валерый Малашка.