Як віцебскія ўлады штогод выкідваюць грошы на рамонт адных і тых жа аб'ектаў

Усё пра рамонт дарог у Віцебску.

У Віцебску звон звоніць па грошах, выкінутых на штогадовыя рамонты - адных і тых жа дарог і аб'ектаў.

Лесвіца на Успенскую гару, пабудаваная ў 2010. Ужо праз год тут з'явілася расколіна. Праз два - адвалілася тынкоўка. Пазней - плітка. Цяпер аздабленне ў адным з галоўных турыстычных месцаў горада рамантуюць штогод, паведамляе «Белсат».

Тая ж сітуацыя з віцебскімі дарогамі.

«Напэўна, ёсць нейкая сувязь паміж уладальнікамі таго завода, які вырабляе гэтую плітку, і сталымі ўжо месцамі рамонту дарог, дзе кладзецца гэтая плітка. Нават там, дзе добры асфальт, дзе яшчэ добрыя дарогі, усё адно ён здымаецца, і кладуць плітку. Праз год гэтая плітка крышыцца», - кажа Таццяна Севярынец з Беларускай хрысціянскай дэмакратыі.

За два кіламетры ад цэнтра Віцебска журналісты назіраюць іншую сітуацыю. Разруха тая ж, але замест асфальту або пліткі - ямы, лужыны і нават цэгла.

«Усё жыццё ў такіх умовах жывем. На вуліцы Горкага крыху паклалі асфальт. І ўсё, больш нічога. Нам хутка туды ісці (паказвае на зямлю, - заўв.) - навошта нам асфальт?», - кажа мясцовы жыхар.

Відавочна, на гэтыя віцебскія вуліцы госці Славянскага базару не зазіралі. Таму і выдаткоўваць грошы на гэта чыноўнікі не спяшаюцца.

«Хай улады падумаюць, што трэба ўсё ж не толькі цэнтр рамантаваць і прыводзіць у парадак. Але і іншыя вуліцы, дзе жывуць людзі», - кажа жыхар Віцебска.

Але на гэта няма грошай. Прынамсі, гэта вынікае з адказаў чыноўнікаў.

«Жыхары прыватнага сектара 5-й камунальнай разам з віцебскімі актывістамі БХД збіралі подпісы пад зваротам у гарвыканкам і гарадскі савет дэпутатаў», - кажа грамадская актывістка Алена Шабуня.

Беларусы прасілі заасфальтаваць вуліцы Віцебскую, Зялёную, Рыжскую, Кіеўскую, Шырокую, Смятаніна і 43-га войска. Аднак, атрымалі адмову. З цытаты намесніка старшыні Віцебскага гарвыканкаму Сяргея Салгаева, «у сувязі з дэфіцытам фінансавых сродкаў у дзяржаўным бюджэце».