З Акадэміі кіравання будуць рабіць «першую ВНУ»

Навучальная ўстанова атрымае «асаблівы статус».

Акадэміі кіравання пры Лукашэнку плануюць надаць асаблівы статус. Пра гэта паведаміла кіраўніца адміністрацыі кіраўніка Наталля Качанава, прадстаўляючы калектыву ВНУ новага рэктара Генадзя Пальчыка, піша БелТА.

- Лукашэнка паставіў задачу: гэта павінна быць найлепшая ВНУ, першая ВНУ. Мы ўжо думаем пра тое, што ў гэтай навучальнай установы павінен быць асаблівы статус. Мы паведамілі Лукашэнку, і ён пагадзіўся з намі, - сказала Наталля Качанава.

Паводле ейных слоў, Лукашэнка хоча раз на паўгода бываць у акадэміі, каб сустракацца з прафесарска-выкладчыцкім складам, слухачамі і студэнтамі.

Наталля Качанава звярнула ўвагу, што асноўная задача акадэміі - рыхтаваць высокапрафесійныя, адказныя і ініцыятыўныя кіроўныя кадры.

Нагадаем, больш за год таму Лукашэнка раскрытыкаваў Акадэмію кіравання.

- Калі цяперашняе кіраўніцтва Акадэміі кіравання не разумее, што рабіць, яго трэба неадкладна замяніць. Туды яно было і накіравана для таго, каб правесці нармальную працу, - казаў дыктатар. - Трэба паглядзець, каго мы там будзем рыхтаваць, і пад іх рабіць праграмы. Туды павінны трапляць толькі перспектыўныя будучыя дзяржаўныя службоўцы, якія заўтра будуць запатрабаваныя. А вы прааналізуйце, колькі там атрымалі адукацыю людзей, якія заўтра наогул на пенсію сыходзяць. Яны як былі на гэтых пасадах, так і засталіся. Навошта мы туды іх накіроўваем, які сэнс у гэтым?