Егіпецкі адвакат падаў пазоў на €1 мільярд супраць Рамаса

Ён палічыў гішпанца вінаватым у траўме нападніка каманды Егіпта Махамеда Салаха.

У эфіры егіпецкага тэлеканала Sada El-Balad Басем Вахба абвясціў, што падаў пазоў у суд супраць Серхіа Рамаса. Ён запатрабаваў кампенсацыі «фізічнай і псіхалагічнай шкоды», паведамляе РБК са спасылкай на Goal.com.

«Рамас наўмысна траўмаваў Мо Салаха і павінен быць пакараны за свае дзеянні. Я падаў пазоў у суд, а таксама скаргу ў ФІФА. Я патрабую кампенсацыі, якая можа перавысіць €1 млрд. Патрабую выплаты шкоды, якую Рамас прычыніў Салаху і ўсяму егіпецкаму народу», - сказаў Вахба.

Адвакат удакладніў, што ў выпадку, калі ён выйграе суд, грошы будуць перададзеныя ў дзяржаўны дабрачынны фонд Long Live Egypt Fund.

Раней петыцыю з патрабаваннем пакараць Рамаса за фол супраць Салаха, апублікаваную на сайце Change.org, падпісалі больш за 300 тысяч чалавек. Аўтары петыцыі звярнуліся да ФІФА і УЕФА, указаўшы, што Рамас наўмысна нанёс траўму Салаху, а таксама, што гішпанец сваімі паводзінамі «парушае дух гульні».

Салах вывіхнуў плячо пасля сутыкнення з Рамасам на 31-й хвіліне сустрэчы. Капітан «Рэала» ў гэтым эпізодзе ўтрымліваў спаборніка на руку, і Салах атрымаў траўму, стукнуўшыся плячом аб газон. Замест яго на поле выйшаў Адам Лалана.

Фінальны матч Лігі чэмпіёнаў завяршыўся з лікам 3:1 на карысць «Рэала». Адзіны гол у складзе «Ліверпуля» забіў Садзьё Мане, у «Рэала» дубль зрабіў Гарэт Бэйл і яшчэ адзін гол забіў Карым Бензема. «Ліверпуль» пасля сыходу Салаха з поля страціў ініцыятыву ў матчы і амаль не стварыў небяспечных момантаў.

Напярэдадні, 27 траўня, міністр спорту Егіпта Халед Абдэль Азіз паведаміў, што на аднаўленне Салах спатрэбіцца два тыдні. Калі не будзе ўскладненняў, форвард зможа аднавіцца да старту чэмпіянату свету.