Расейскім банкам напісалі некралог

Самастойнае «лячэнне» расейскага банкаўскага сектара ў найбліжэйшай перспектыве немагчымае.

Толькі кожны пяты банк здольны самастойна генераваць прыбытак, каб папаўняць капітал, а дзве траціны крэдытных арганізацый у апошнія 3 гады хоць бы раз аказваліся ў крытычным становішчы і змаглі працягнуць дзейнасць толькi за кошт уліванняў звонку. Такая выснова змяшчаецца ў апублікаваным у сераду дакладзе Аналітычнага крэдытнага рэйтынгавага агенцтва (АКРА), паведамляе finanz.ru.

Паводле ацэнцы агенцтва, летась найбуйнейшыя расейскія банкі, актывы якіх складаюць 89% усёй сістэмы, замест папаўнення капіталу за кошт прыбытку ад аперацый пачалі яго губляць: сярэднеўзважанае значэнне генерацыі капіталу з 76 базісных пунктаў павалілася да мінус 86 Б.П.

Прычынай сталі страты на 1,45 трыльёна рублёў, якія былі прызнаныя трыма банкамі, нацыяналізаваныя за кошт фонду санацыі ЦБ. На выратаванне ФК «Адкрыццё», Бінбанка і Прамсувязьбанка цэнтрабанк выдаткаваў 2,62 трыльёна рублёў.

Найбліжэйшыя два гады банкаўскаму сектару спатрэбіцца яшчэ 500 мільярдаў рублёў, папярэджвае АКРА: гэтую суму, згодна з нарматывам, давядзецца накіраваць у рэзервы на пакрыццё праблемных актываў, якія множацца на фоне стагнацыі эканомікі.

У шэрагу галін назапасіліся крэдытныя рызыкі, якія пакуль яшчэ не да канца адлюстраваныя на балансах, мяркуюць у агенцтве: праблемы з выплатамі ў крэдытах пагражаюць будаўнічаму сектару і кампаніям у сферы нерухомасці. У той жа час узмацненне жорсткасці санкцый Захаду прыводзіць да «пагаршэння фінансавага стану найбуйнейшых кампаній-пазычальнікаў», а нізкія тэмпы эканамічнага росту (1,5-1,7%) трансліруюцца ў «слабы попыт на крэдытныя рэсурсы».

У гэтых умовах «цікавасць уласнікаў да банкаўскага бізнэсу працягвае падаць», канстатуе АКРА: не маючы перспектывы выхаду з крызісу, уладальнікі банкаў страчваюць жаданне ўкладваць грошы, і «асноўнай крыніцай фінансавай дапамогі становіцца дзяржава».

«Да 2021 года каэфіцыент усярэдненай генерацыі капіталу (КУГК) у цэлым па сістэме будзе знаходзіцца на нізкім узроўні - у сярэднім 70 б. п., а дастатковасць асноўнага капіталу па МСФС (Tier-1) не перавысіць 11,4%. Гэта тлумачыцца таксама малой колькасцю банкаў, што стабільна генерыруюць капітал, і ўказвае на аб'ектыўную патрэбнасць у далейшай падтрымцы ад дзяржавы для пакрыцця страт», - гаворыцца ў дакладзе АКРА.

Карціна, намаляваная АКРА, «феерычна дэпрэсіўная», але пярэчанняў па сутнасці яна не выклікае, кажа дырэктар аналітычнага дэпартамента «Лока-Інвест» Кірыл Трэмасаў.

«Працэсы, якія адбываюцца ў банках, заўсёды з'яўляюцца найлепшай ілюстрацыяй стану эканомікі. Часам гэта больш наглядна, чым лічбы Расстата», - дадае ён.