Цэнтрабанк Літвы: Рынак працы бурліць, рост заробкаў дасягнуў 10-гадовага рэкорду

Заробак у краіне-суседцы Беларусі ўжо некалькі гадоў расце ва ўсіх эканамічных сектарах.

Паколькі кампаніям не выстарчае работнікаў, Цэнтрабанк Літвы павялічвае прагноз росту заробкаў на гэты год з 6,7 да 7,6%, піша delfi.lt.

«Рынак працы бурліць: рост заробкаў дасягнуў 10-гадовага рэкорду», - сказаў 25 чэрвеня на прэс-канферэнцыі прадстаўнік ЦБ Літвы Гедымінас Шымкус. Ён адзначыў, што ў першым квартале 2018 года гадавы рост заробкаў склаў 9,8%. Паводле ацэнкі ЦБ, па меры скарачэння беспрацоўя і росце патрэбы ў працаўніках, бізнэс можа развязаць праблему недахопу працоўных рук трыма спосабамі: падвышэннем заробкаў, інвестыцыямі ў мадэрнізацыю вытворчасці і завозам работнікаў з трэціх краін.

«Паводле статыстыкі, заробак ужо некалькі гадоў расце ва ўсе эканамічных сектарах. У мінулым больш за ўсё гэта павінны былі адчуць работнікі сферы гандлю, сельскай гаспадаркі, інфармацыі і сувязі, будаўніцтва, апрацоўчай прамысловасці, іх заробкі павялічыліся на 9-11%. Напруга на рынку астуджае прыток інвестыцый, якія ўмацоўваюць вытворчыя магутнасці. Праўда, частка інвестыцый накіраваная на будаўніцтва будынкаў, што павышае попыт на дэфіцытную працоўную сілу. На рынку адчуваюцца наступствы эміграцыі, частку страт стараюцца кампенсаваць прывозам работнікаў з трэціх краін», - сказана ў прэс-рэлізе банка.

Мяркуюць, што рост эканомікі сёлета складзе 3,2%, у наступным - 2,7%. Беспрацоўе знізіцца з 6,7 да 6,6%.

«Мы наш прагноз не мяняем, прагназуем хуткі рост», - сказаў Шымкус. ЦБ прагназуе, што сярэднегадавая інфляцыя, якая летась складала 3,7%, сёлета складзе 2,7%, г.зн., на 1% менш.

«Нягледзячы на тое, што рост коштаў нафты ў пачатку гэтага года, у параўнанні з 2017 г запаволіўся, у траўні праз напружанне на міжнародных рынках кошты зноў павялічыліся, паралельна падскочылі кошты бензіну і дызельнага паліва. Кошты малака і малочных прадуктаў сёлета растуць павольней, чым у 2017 году, мяса - амаль напалову павольней, а на ўсю ежу - на 1/6 менш, чым летась. Інфляцыю прыпыніць і больш павольны рост акцызаў, коштаў паслуг», - сказана ў паведамленні.