Італіец зладзіць прабег на матаролеры ў дапамогу дзецям з Гомеля

36-гадовы італіец збіраецца за 14 дзён праехаць больш за 8 тысяч кіламетраў.

Алесандра Поці з італійскага горада Ерага-кон-Арага здзейсніць тур па Еўропе для збору сродкаў у дапамогу дзецям-чарнобыльцам з Гомельскай вобласці. Старт прызначаны на 8 жніўня з Пармы. Пра гэта паведамляе мясцовая прэса (пераклад - belmir.by).

36-гадовы італіец збіраецца за 14 дзён праехаць на матаролеры «Веспа» 1962 года выпуску 8 600 кіламетраў, пабываўшы пры гэтым у 15 краінах.

А менавіта: у Італіі, Славеніі, Аўстрыі, Чэхіі, Польшчы, Беларусі, Украіне, Малдове, Румыніі, Балгарыі, Турцыі, Сербіі, Чарнагорыі, Босніі і Герцагавіне і Харватыі.

Мадэль «Веспа» крэмавага колеру, на якой Поці зладзіць прабег і якая носіць імя Гаспар, захавалася ў першапачатковым выглядзе, з іржой і іншымі прыкметамі зносу.

- Гэтая экспедыцыя будзе складанай, асабліва фізічна, бо, паводле маіх падлікаў, каб укласціся па часе, давядзецца ехаць ад 12 да 15 гадзін на дзень, - тлумачыць Алесандра.

Сабраныя сродкі паступяць у арганізацыю Help for Children Parma. Затым іх накіруюць у школы, лякарні і іншыя гомельскія ўстановы, якія працуюць з дзецьмі-чарнобыльцамі.

«Веспа» - культавы італійскі матаролер, выраблены з 1946-га. З'яўляецца родапачынальнікам еўрапейскай канструктарскай школы мотаролераў і першым паспяховым скутэрам у свеце.