У цэнтры скандалу: як «Гомсельмаш» выштурхваюць з расейскага рынка

Што не падзялілі расейскія і беларускія прадпрыемствы-кампаньёны?

Не цішэюць скандалы вакол аднаго з найбуйнейшых вытворцаў камбайнаў на тэрыторыі РФ: расейска-беларускага прадпрыемства ЗАТ СП «Брансксельмаш», піша «Завтра твоей страны».

Кампаньён трапіўся з довадамі злачынства

Нагадаем, што нядаўна Следчы камітэт Беларусі паведаміў пра затрыманне генеральнага дырэктара «Брансксельмаша» Валерыя Сулеева. Як вынікае з заявы СК РБ, 54-гадовы кіраўнік бранскага прадпрыемства (ён з'яўляецца грамадзянінам Беларусі) трапіўся з довадамі злачынства пры перадачы хабару сумай 1 млн расейскіх рублёў намесніку генеральнага дырэктара і начальніку аднаго з аддзелаў Гомельскага завода ліцця і нармалей. Апошнія, паводле інфармацыі беларускіх праваахоўнікаў, выступалі ініцыятарамі закупкі камплектуючых для патрэб гэтага прадпрыемства.

Гомельскі завод ліцця і нармалей, таксама як і «Брансксельмаш» з'яўляюцца структурнымі адзінкамі найбуйнейшага сельскагаспадарчага машынабудаўнічага холдынгу Беларусі - «Гомсельмаша». Напрыклад, «Брансксельмаш» з 2005 года займаецца вытворчасцю паводле ліцэнзіі і рэалізацыяй сельскагаспадарчай тэхнікі на расейскім рынку. З 2016 года ён прасоўваецца ў Расеі пад брэндам «Дзясна-Палессе».

Холдынгу «Гомсельмаш» належыць 51% долі ў супольным прадпрыемстве, якое ўваходзіць у лік лідараў на камбайнавым рынку Расеі. Астатнія яго акцыі размеркаваныя паміж расейскімі партнёрамі. Напрыклад, 47,34% акцый валодае былы намеснік кіраўніка адміністрацыі Бранска Леанід Гранкін, 1,66% акцый належаць кампаніі «Брансксельгасмаш», якую ён узначальвае.

Спрэчкі ў шэрагах акцыянераў

Аднак, як сведчаць матэрыялы справы, якая знаходзіцца на разглядзе Арбітражнага суда Бранскай вобласці, паміж партнёрамі ўзніклі рознагалоссі.

Кампанія «Брансксельгасмаш» звярнулася з пазовам да «Гомсельмаша». Расейскае прадпрыемства спрабуе праз суд абавязаць гомельскі холдынг прадаць 2% акцый ЗАТ СП «Брансксельмаша» за 602 тысячы расейскіх рублёў.

У выпадку задавальнення гэтага пазову Леанід Гранкін і ягоныя партнёры атрымаюць кантрольны пакет бранскага вытворцы камбайнаў.

Арбітражны суд Бранскай вобласці пакуль не прыняў пастановы.

На думку суда, сама заява была пададзеная з «парушэннем патрабаванняў» некалькіх артыкулаў расейскага арбітражнага працэсуальнага кодэкса. У вызначэнні, прынамсі, паказана, што пазоўнік у ліку іншага не падаў суду «довадаў, якія пацвярджаюць намеры адказчыка – ААТ «Гомсельмаш» прадаць акцыі ЗАТ СП «Брансксельмаш» трэцяй асобе».

Аднак суд даў пазоўніку час на выпраўленне памылак і гатовы чакаць новай заявы да 20 ліпеня 2018 года.