Якую гародніну смела можна есці сырой
3- 21.07.2018, 19:13
- 17,789
Ніколі не каштавалі сырыя шампіньёны або брокалі?
Дыетолагі апавялі, якую гародніну можна есці сырой, хоць у нас у краіне гэта асабліва і не прынята. А дарма – менавіта ў сырым выглядзе яна захоўвае максімальную карысць, піша healthystyle.info.
1. Кветкавая капуста
Па-першае, кветкавая капуста вельмі карысная: у ёй мала калорый, шмат клятчаткі, вітамінаў С і К, сульфарафану і халіну. Менавіта апошні дапамагае падтрымліваць структуру клеткавых мембран і ўдзельнічае ў стварэнні ацэтылхаліну – нейрамедыятару, які ў немалой ступені ўплывае на здароўе мозгу і дапамагае прадухіліць сур'ёзныя нейрадэгенератыўныя захворванні (напрыклад хваробу Альцгеймера).
Па-другое, сырая кветкавая капуста – гэта смачна. Яна нечым падобная на... звычайную белакачанную капусту. Добра яе вымыйце, разбярыце на суквецці, дадайце хумус або гуакамоле – і хуткі карысны перакус гатовы.
2. Брокалі
Брокалі часта пераварваюць, і праз гэта яна ператвараецца ў неапетытную зялёную масу. А свежая сырая брокалі – храбусткая і сакавітая. Пры тэрмічнай апрацоўцы яна страчвае частку вітамінаў, напрыклад вітамін С: калі ў 100 грамах брокалі ўтрымліваецца блізу 90 мг вітаміну, то пры варэнні амаль 40% знікае.
Акрамя гэтага, брокалі ўтрымлівае калій, вітаміны А, абалоніну, фоліевую кіслату і сульфарафан – важнае рэчыва, якое можа паніжаць ціск, паляпшаць здароўе сэрца і нават змагацца з ракавымі клеткамі. Даследаванне галандскіх навукоўцаў паказала, што засваяльнасць сульфарафану вышэйшая пры ўжыванні сырой брокалі, чым гатаванай.
3. Балгарскі перац
Адзін сярэдні балгарскі перац утрымлівае прыкладна 32 калорыі і шмат вітаміну С – амаль 150% сутачнай нормы. Пры тэрмічнай апрацоўцы частка вітаміну руйнуецца, таму, калі вы хочаце атрымаць максімум карысці ад гэтай гародніны, лепш яе есці сырой. Да таго ж балгарскія перцы – выдатная крыніца вітаміну В6, вітаміну E і магнію. Дадавайце іх у салаты або выкарыстоўвайце ў якасці перакусу з іншай гароднінай і дып-соусамі.
4. Маладыя кабачкі
Сырыя кабачкі нечым падобныя на нятлустае авакада, таму яны выдатна падыдуць для лёгкіх агароднінных салатаў. З маладых пладоў можна зрабіць спагеці або канверцікі для закускі.
Сярэдні малады кабачок утрымлівае блізу 33 калорый, больш за 2 грамы бялку, 2 грамы клятчаткі, вітамін А, вітамін С і калій – важны элемент для функцыянавання ўсяго арганізма.
5. Бурак
Буракі звычайна асацыююцца з баршчом, вінегрэтам або максімум з салатай з запечанай гародніны. Але яны добра падыходзяць для салатаў і ў сырым выглядзе. Проста натрыце буракі, моркву і яблык, дадайце трохі цытрынавага соку і імбіру – і лёгкая салата з вялікай колькасцю клятчаткі гатовая.
Буракі багатыя на вітамін С, калій, марганец і фоліевую кіслату (вітамін В9), якая дапамагае імуннай і крывяноснай сістэмам і падтрымлівае рэпрадуктыўныя функцыі арганізма.
6. Шампіньёны
Мы ведаем, што шампіньёны – гэта не гародніна, але пастанавілі не адводзіць ім асобнага спісу.
Шампіньёны, у адрозненне ад лясных грыбоў, можна спакойна есці сырымі. Самы просты варыянт – дадаваць іх у гароднінныя салаты і гарніры або есці цалкам, папырскаўшы цытрынавым сокам або соевым соусам.
Мінімальная колькасць калорый і шмат вітамінаў групы В, калій, магній і раслінны бялок робяць шампіньёны незаменным інгрэдыентам для вегетарыянцаў.