Швэцыя заняла першае месца ў рэйтынгу самых тэхналагічна развітых краін

Разам са Швэцыяй у першым шэрагу яшчэ дзве дзяржавы.

Швэцыя заняла першае месца рэйтынгу краін, найбольш адкрытых для новых тэхналогій, складзенага аналітычным аддзелам брытанскага часопіса The Economist - Economist Intelligence Unit. Разам са Швэцыяй у першым шэрагу выявіліся Сінгапур і Аўстралія, паведамляе euro-pulse.ru.

Летась сярод лідараў была Фінляндыя, а у 2018 годзе яна падзяліла 4-е месца з яшчэ пяццю краінамі - Францыяй, Нідэрландамі, Нямеччынай, Японіяй і ЗША. Расея сёлета на 32-м месцы разам са Славеніяй, Кітаем і Аргенцінай.

У рэйтынг увайшлі 82 буйныя эканомікі свету. Вынік вылічвалі на аснове трох крытэраў: гэта выкарыстанне інтэрнэту (і кампаніямі, і жыхарамі краін), інфраструктура для лічбавай эканомікі (онлайн-гандаль, электронны ўрад, узровень кібербяспекі) і адкрытасць для інавацый (напрыклад, актыўнасць даследаванняў у краіне і яе ўзаемадзеянняў з распрацоўшчыкамі ў астатнім свеце). Са слоў распрацоўшчыкаў, гэты рэйтынг павінен дапамагчы інавацыйным кампаніям зарыентавацца ў міжнародным лічбавым асяроддзі.